Videoja tregon lëvizjet e të dyshuarit orë para dhe pas sulmit ku u vranë dy studentë dhe u plagosën nëntë të tjerë
FBI ka publikuar një video-timeline të detajuar që tregon lëvizjet e autorit të dyshuar të të shtënave masive në Universitetin Brown, ngjarje e ndodhur të shtunën dhe që tronditi opinionin publik në Shtetet e Bashkuara. Pamjet janë mbledhur nga kamerat e sigurisë së banesave përreth kampusit dhe dokumentojnë qartë lëvizjet e tij disa orë përpara dhe menjëherë pas sulmit.
Sipas FBI-së, pamjet e para janë regjistruar rreth orës 14:00, afro dy orë para se të ndodhte sulmi fatal. Në video, i dyshuari shihet duke lëvizur në mënyrë të përsëritur në zonën rezidenciale pranë Cooke Street, duke kaluar disa herë pranë të njëjtave banesa, çka sipas hetuesve tregon sjellje vëzhguese dhe të qëllimshme.
Në një moment, rreth orës 14:16, i dyshuari duket se trembet nga një kalimtar i rastësishëm dhe ndryshon drejtim, duke u kthyer mbrapsht. Pas sulmit, kamerat e sigurisë dhe një kamerë e vendosur në automjet regjistrojnë atë duke kaluar me nxitim pranë makinave të policisë dhe shërbimeve të emergjencës, vetëm minuta pasi të shtënat ishin raportuar.
Në sulmin në Universitetin Brown humbën jetën dy studentë, Mukhammad Aziz Umurzokov dhe Ella Cook, ndërsa nëntë persona të tjerë mbetën të plagosur. Autori i dyshuar vazhdon të jetë në arrati dhe FBI ka intensifikuar kërkimet, duke u bërë thirrje qytetarëve të ndihmojnë me çdo informacion që mund të çojë në identifikimin dhe arrestimin e tij.
Autoritetet amerikane theksojnë se hetimet janë në fazë aktive dhe se publikimi i pamjeve synon të ndihmojë në përparimin e hetimit, ndërsa komuniteti universitar dhe familjet e viktimave vijojnë të përballen me pasojat e një prej ngjarjeve më të rënda të viteve të fundit në një kampus universitar amerikan.
About the Author
