Operacioni i zhvilluar nga brenda territorit rus goditi një prej sistemeve më të avancuara të mbrojtjes ajrore, duke e përshkallëzuar ndjeshëm luftën teknologjike mes Kievit dhe Moskës.
Forcat Speciale të Ukrainës SSO kanë njoftuar se kanë shkatërruar një sistem rus të mbrojtjes ajrore Buk-M3 dhe një radar të llojit Nebo-U në rajonin rus të Rostovit, që kufizohet me Ukrainën lindore. Operacioni është kryer në fund të shtatorit, por u konfirmua zyrtarisht më 31 tetor.
Sipas njoftimit të SSO, sistemi Buk-M3 ishte në gjendje të qëllonte objektiva deri në një distancë prej 80 kilometrash, ndërsa radari Nebo-U kishte kapacitet për të zbuluar avionë luftarakë deri në 400 kilometra larg. Të dy këto sisteme përbënin kërcënim të madh për operacionet e aviacionit ukrainas dhe pengesë për sulmet në thellësi të territorit rus, thuhet në deklaratë.
Çdo kompleks, sipas të dhënave të SSO, ka vlerë që shkon në qindra milionë dollarë. Goditja e tyre është pjesë e një strategjie të re të Ukrainës për të dobësuar mbrojtjen ajrore ruse dhe për të zhvendosur luftën në territorin e armikut përmes dronëve dhe raketave të prodhimit vendas.
Në raportet e fundit, ushtria ukrainase ka njoftuar se gjatë 24 orëve të fundit ka neutralizuar rreth 970 trupa ruse, duke e çuar numrin total të humbjeve ruse që nga 24 shkurti 2022 në mbi 1.14 milionë. Po ashtu, sipas të dhënave të Shtabit të Përgjithshëm të Kievit, Rusia ka humbur më shumë se 11 mijë tanke, 23 mijë automjete të blinduara dhe 76 mijë dronë gjatë konfliktit.
Në të njëjtën ditë, Rusia kreu sulme të reja ajrore ndaj Ukrainës, duke lëshuar 146 dronë dhe një raketë balistike, prej të cilëve 107 u neutralizuan nga mbrojtja ajrore ukrainase. Sipas autoriteteve lokale, të paktën 14 civilë u vranë dhe 71 u plagosën në disa rajone, përfshirë Donetsk, Zaporizhia, Kherson, Kharkiv dhe Sumy.
Ndërkohë, një hetim i publikuar nga media ruse e pavarur Verstka ka zbuluar raste të shumta ekzekutimesh dhe torturash brenda vetë ushtrisë ruse, ku oficerë të lartë urdhërojnë vrasjen e ushtarëve të tyre për mosbindje. Praktika e njohur si obnulenie zerim po përhapet, duke reflektuar tensionet dhe kaosin në radhët e forcave ruse.
Ndërsa Ukraina vazhdon të godasë thellë në territorin rus, analistët vlerësojnë se këto sulme po ndryshojnë ekuilibrin e luftës, duke i imponuar Moskës një barrë të re logjistike dhe psikologjike. Lufta, që tashmë ka hyrë në ditën e saj të 1344-të, po shënon një fazë të re ku teknologjia, dronët dhe inteligjenca luajnë një rol vendimtar në fushën e betejës.
About the Author
