Ngjarja e rëndë ndodhi në fshatin Gjorm mbrëmjen e djeshme. Viktima, administrator i kompanisë “Allidagu” në Fier, humbi jetën gjatë rrugës për në spital. Autori, kushëriri i tij Bertil Alliaj, u arrestua nga policia.
Një ngjarje e rëndë me motive ende të paqarta ka tronditur Vlorën mbrëmjen e së shtunës. 36-vjeçari Dalan Alliaj, biznesmen i njohur në zonën e Fierit, u ekzekutua me gjashtë plumba nga kushëriri i tij, Bertil Alliaj, në fshatin Gjorm të Selenicës.
Sipas të dhënave paraprake, përplasja mes dy të afërmve ka ndodhur pas një debati të ashpër, i cili përfundoi me përdorimin e armës. Dalan Alliaj u plagos rëndë dhe, pavarësisht ndërhyrjes së menjëhershme të familjarëve, ndërroi jetë gjatë rrugës për në spitalin e Vlorës.
Viktima rezulton administrator i kompanisë “Allidagu” me seli në Fier, një biznes që operon në sektorin e prodhimit dhe përpunimit të ushqimeve, tregtinë e kafshëve të gjalla dhe shërbimet mekanike për automjete.
Policia e Vlorës ka arrestuar autorin e dyshuar, Bertil Alliaj, ndërsa po vijojnë hetimet për zbardhjen e plotë të motiveve të krimit që ka tronditur komunitetin lokal.
Në vendngjarje u sekuestrua arma e krimit dhe disa prova materiale që pritet të ndihmojnë në hetim. Grupi hetimor po punon për të verifikuar nëse konflikti mes dy kushërinjve kishte prapavijë ekonomike apo familjare.
About the Author
