Ceremonia më prestigjioze e futbollit shqiptar do të zhvillohet më 15 dhjetor në Teatrin e Operas dhe Baletit, duke bashkuar emrat më të njohur të sportit, artit dhe medias.
Federata Shqiptare e Futbollit ka zyrtarizuar detajet e edicionit të katërt të “Topit të Artë 2025”, ngjarjes që është kthyer tashmë në simbol të vlerësimit për më të mirët e futbollit shqiptar.
Në mbledhjen e fundit të Komitetit Ekzekutiv, FSHF miratoi datën, vendin e zhvillimit dhe ekipin drejtues të spektaklit. Ashtu si vitin e kaluar, në rolin e producentit ekzekutiv do të jetë sërish Ardit Gjebrea, i cili pritet të sjellë një tjetër mbrëmje madhështore që bashkon elegancën e artit me emocionin e futbollit.
Ceremonia Gala do të mbahet më 15 dhjetor në ambientet e Teatrit të Operas dhe Baletit, ku do të jenë të pranishëm futbollistët më të spikatur të vitit, trajnerë, drejtues klubesh, përfaqësues të institucioneve ndërkombëtare të futbollit, si dhe figura të njohura të artit e medias.
“Topi i Artë” është kthyer në një traditë që nderon jo vetëm arritjet sportive, por edhe kontributin e personaliteteve që kanë lënë gjurmë në zhvillimin e futbollit shqiptar. Edicioni i ri pritet të sjellë edhe disa risi në mënyrën e prezantimit dhe ndarjes së çmimeve, ndërsa FSHF premton një event të standardeve europiane.
Për katër vite rresht, kjo mbrëmje ka qenë vitrina zyrtare e ekselencës sportive në Shqipëri, dhe edicioni i sivjetshëm pritet të jetë një tjetër spektakël që do të bashkojë futbollin dhe artin në një natë të vetme.
About the Author
