Pavarësisht marrëveshjes së armëpushimit të 11 tetorit, situata humanitare në Gaza mbetet dramatike. OBSH njofton për viktima të reja, ndërsa SHBA thekson se nuk do të dërgojë trupa tokësore.
Gaza vijon të jetë në gjendje alarmi edhe pas hyrjes në fuqi të armëpushimit të 11 tetorit. Sipas të dhënave të fundit nga Organizata Botërore e Shëndetësisë, në vetëm dy javë janë regjistruar 89 të vdekur dhe 317 të plagosur. Drejtori i përgjithshëm i OBSH, Tedros Adhanom Ghebreyesus, paralajmëroi se “kriza është ende larg përfundimit” dhe kërkoi shtim urgjent të ndihmave humanitare dhe mjekësore për popullsinë civile.
Ndërkohë, Shtetet e Bashkuara kanë sqaruar qëndrimin e tyre mbi zhvillimet në terren. Zëvendëspresidenti amerikan JD Vance, pas një vizite në Izrael, deklaroi se Uashingtoni nuk do të përfshihet me forca tokësore në operacionet e Gazës, duke theksuar se roli i SHBA do të mbetet diplomatik dhe mbikëqyrës. “Pa trupa amerikane në terren, por me lidership për paqen,” – tha ai, duke nënvizuar rëndësinë e respektimit të armëpushimit dhe të një procesi të qëndrueshëm çarmatimi për Hamasin.
Vance po ashtu bëri të ditur se po shqyrtohet krijimi i një force ndërkombëtare sigurie që do të ndihmojë në mbikëqyrjen e zbatimit të marrëveshjeve. Ai përsëriti qëndrimin e presidentit Donald Trump se çdo tentativë për aneksimin e Bregut Perëndimor do të dëmtonte paqen afatgjatë.
Në terren, organizatat humanitare raportojnë mungesa ekstreme të ujit, ushqimeve dhe energjisë. Spitalet funksionojnë me gjysmë kapaciteti, ndërsa ekipet e shpëtimit vazhdojnë të nxjerrin trupa nga rrënojat e bombardimeve të mëparshme. Armëpushimi mund të ketë ndalur luftën, por plagët e Gazës mbeten të hapura.
About the Author
