Autoritetet zbulojnë bashkëpunim mes shtetasve rusë e ukrainas në rrjetin kriminal të ishullit turistik
Një gjykatë në Indonezi ka dënuar me burgim të përjetshëm shtetasin ukrainas Roman Nazarenko, i akuzuar si pjesë e një rrjeti të madh ruso-ukrainas të narkotikëve që operonte në ishullin turistik të Balit.
Nazarenko, i shpallur në kërkim nga Interpoli, u arrestua në dhjetor në aeroportin Suvarnabhumi të Bangkokut, teksa përpiqej të arratisej drejt Dubait. Ai kishte qenë në arrati për shtatë muaj pas një bastisjeje policore në një vilë luksoze në Bali, ku autoritetet zbuluan një laborator të pajisur për kultivimin e marijuanës dhe prodhimin e substancave për drogën sintetike ekstazi.
Prokurorët e cilësuan atë si një nga organizatorët kryesorë të aktivitetit, duke argumentuar se kishte rekrutuar bashkëpunëtorët, kishte siguruar pajisje dhe fara marijuane, si dhe kishte mbikëqyrur laboratorin. Gjatë seancës në Gjykatën e Denpasarit, Nazarenko mohoi përgjegjësinë e plotë dhe u shpreh se ishte mashtruar nga një tjetër shtetas rus, Oleg Tkachuck, i identifikuar si truri i operacionit, i cili ende është në arrati.
Kryegjyqtarja Eni Martiningrum tha se nuk kishte asnjë arsye për të falur të pandehurin: “Krimi i tij mund të dëmtojë seriozisht gjeneratat e reja”.
Përveç Nazarenkos, gjatë bastisjes u arrestuan edhe dy vëllezër ukrainas, Mykyta dhe Ivan Volovod, si dhe një rus, Konstantin Krutz. Të tre u dënuan me nga 20 vite burg. Prokuroria tha se vëllezërit prodhonin substancat, ndërsa Krutz merrej me shpërndarjen.
Indonezia është e njohur për ligjet e saj jashtëzakonisht të ashpra kundër drogës, ku dënimi kapital për trafikantët mbetet ende në fuqi. Rasti ka tërhequr vëmendjen e opinionit ndërkombëtar, edhe për faktin se Bali është kthyer në një destinacion për mijëra shtetas rusë dhe ukrainas që janë larguar nga lufta që nisi në vitin 2022.
Ky vendim i rreptë vë në pah përpjekjet e Indonezisë për të frenuar kriminalitetin ndërkombëtar dhe për të ruajtur reputacionin e Balit si një nga destinacionet turistike më të njohura në botë
About the Author
