Incidenti dyshohet se nisi pas grabitjes së një valixheje në ashensorin e parkimit; një i arrestuar, hetimet vazhdojnë ndërsa trafiku në aeroport mbetet i ngarkuar.
Një incident i rëndë ka ndodhur në aeroportin Heathrow në Londër, ku 21 persona u dëmtuan pasi u ekspozuan ndaj një substance të dyshuar si pepper spray. Ngjarja ndodhi në parkimin shumëkatësh të Terminalit 3 rreth orës 08:00 të mëngjesit, duke shkaktuar kaos, pezullim qarkullimi dhe ndërhyrje masive të policisë së armatosur e shërbimeve emergjente.
Sipas Policisë Metropolitane, një grua është grabitur nga një grup prej katër meshkujsh, të cilët i morën valixhen dhe spërkatën me sprej irritues në drejtimin e saj. Substanca u përhap në hapësirë duke prekur edhe pasagjerët përreth. Pesë persona u dërguan në spital dhe 16 të tjerë, përfshirë një vajzë 3-vjeçare, morën ndihmë në vendngjarje. Fatmirësisht, plagët nuk raportohen si kërcënuese për jetën.
Një 31-vjeçar është arrestuar si i dyshuar për sulm, ndërsa policia po kërkon pjesëtarët e tjerë të grupit. Autoritetet konfirmojnë se ngjarja nuk lidhet me terrorizëm dhe besohet se palët e përfshira njiheshin mes tyre, por përplasja ka degjeneruar në dhunë.
Incidenti solli bllokime rrugore, vonesa të trenave dhe radha të gjata të pasagjerëve, me shumë prej tyre të detyruar të prisnin jashtë terminalit. Heathrow njoftoi se Terminali 3 mbetet i hapur, por rekomandoi udhëtarët të llogarisin më shumë kohë për lëvizje dhe të ndjekin udhëzimet e policisë.
Ndërkohë, forca të shumta sigurie janë vendosur në aeroport për të qetësuar situatën dhe për të vijuar hetimet. Autoritetet kërkojnë dëshmitarë që kanë informacion të kontaktojnë shërbimet policore.
About the Author
