Tremane Wood, i cili pritej të ekzekutohej me injeksion fatal, u dënua përjetë pa lirim nga guvernatori pak çaste para ekzekutimit; pak orë më pas u gjet i rrëzuar dhe i dehidruar.
Një ngjarje e pazakontë ka ndodhur në shtetin e Oklahomës, ku një i dënuar me vdekje u shpëtua vetëm minuta para ekzekutimit dhe më pas u gjet pa ndjenja në qelinë e tij. Tremane Wood, i dënuar për vrasjen me thikë të Ronnie Wipf gjatë një grabitjeje në vitin 2002, pritej të ekzekutohej me injeksion fatal të enjten, por guvernatori Kevin Stitt vendosi ta kthejë dënimin në burgim të përjetshëm pa të drejtë lirimi.
Vendimi erdhi pas rekomandimit të Bordit të Faljeve dhe Lirimit me Kusht, ndërsa Stitt argumentoi se Wood duhet të marrë të njëjtin dënim si vëllai i tij, Zjaiton, i cili ishte bashkëpjesëmarrës në vrasje dhe u dënua me burgim të përjetshëm. Sipas guvernatorit, ky veprim garanton drejtësi të barabartë dhe siguron që Wood të mbetet përgjithmonë jashtë shoqërisë.
Pak orë pas kthimit në qeli, Wood u gjet i rrëzuar dhe pa vetëdije. Zyrtarët e burgut thanë se gjendja e tij ishte pasojë e stresit ekstrem dhe dehidratimit, një kombinim që e kishte çuar në humbje të vetëdijes. Ai u stabilizua më vonë dhe ishte në gjendje të komunikonte, duke thënë se mendon se ishte rrëzuar duke rënë nga krevati.
Wood kishte konsumuar edhe vaktin e fundit, një pjatë me catfish, përpara se ekzekutimi të anulohej. Vendimi i guvernatorit për të ndaluar dënimin me vdekje konsiderohet një rast i rrallë në dy mandatet e tij, duke qenë hera e dytë që Stitt ndërhyn për të ndaluar një ekzekutim.
Rasti ka ngjallur debat të ri në Oklahoma mbi dënimin me vdekje, drejtësinë relative të vendimeve gjyqësore dhe mënyrën se si trajtohen të dënuarit në momentet para ekzekutimit.
About the Author
