Takimet në Florida vijnë përpara një raundi të ri negociatash të ndërmjetësuara nga SHBA mes Moskës dhe Kievit, që pritet të zhvillohen në Abu Dhabi
I dërguari special i Shteteve të Bashkuara, Steve Witkoff, deklaroi se ka zhvilluar takime produktive dhe konstruktive me përfaqësuesin rus Kirill Dmitriev në Florida, në kuadër të përpjekjeve të administratës amerikane për t’i dhënë fund luftës së Rusisë në Ukrainë.
Në një reagim publik, Witkoff u shpreh se SHBA është e inkurajuar nga këto diskutime dhe se Rusia po tregon gatishmëri për të ecur drejt një zgjidhjeje paqësore të konfliktit. Takimet u zhvilluan një ditë përpara një raundi të dytë negociatash të ndërmjetësuara nga SHBA, ku pritej të merrnin pjesë delegacionet e Rusisë dhe Ukrainës në Abu Dhabi.
Në bisedime morën pjesë gjithashtu sekretari amerikan i Thesarit Scott Bessent, Jared Kushner, dhëndri i presidentit amerikan Donald Tramp, si edhe këshilltarë të tjerë të Shtëpisë së Bardhë. As pala amerikane dhe as ajo ruse nuk kanë dhënë detaje konkrete mbi përmbajtjen e diskutimeve.
Nga ana tjetër, presidenti i Ukrainës, Volodymyr Zelenskyy, la të kuptohet se raundi i radhës i bisedimeve mund të shtyhet, duke deklaruar se Kievi po pret informacione shtesë nga SHBA për hapat e mëtejshëm të procesit të paqes.
Takimet e fundit shënojnë negociatat e para publike direkte mes Moskës dhe Kievit që nga javët e para të luftës, ndërsa Uashingtoni po shton presionin diplomatik për arritjen e një marrëveshjeje që do t’i jepte fund konfliktit gati katërvjeçar. Presidenti Tramp ka deklaruar se beson se palët po afrohen drejt një marrëveshjeje, megjithëse mbeten ende çështje të hapura, përfshirë kërkesat territoriale të Rusisë dhe diskutimet mbi vendosjen e forcave paqeruajtëse pas përfundimit të luftës.
About the Author
