Ilir Alimehmeti, i ftuar këtë mbrëmje në “Top Story”, artikuloi një kritikë të qartë dhe të drejtëpërdrejtë ndaj mënyrës se si funksionon aktualisht Partia Demokratike, duke theksuar se problemi i parë që duhet zgjidhur është riparimi i defekteve të brendshme dhe hapja reale ndaj njerëzve të rinj, si thelb i çdo politike të shëndetshme.
Sipas Alimehmetit, politika nuk është vetëm vendimmarrje, por edhe përfaqësim, dhe ky përfaqësim mungon në kryesinë aktuale të PD-së:
“Nëse shihni kryesinë, përfaqësimi është i ulët – si në produktivitet, ashtu edhe në njerëz,” tha ai, duke e lidhur këtë mungesë me krijimin e strukturave artificiale dhe primareve formale.
Ai kujtoi se edhe procesi i primareve të PD-së nuk ka qenë transparent, duke sjellë shembullin e gjashtë fituesve që nuk u lejuan kurrë të futeshin në lista, pavarësisht votës së demokratëve:
“Bëmë primare, por pastaj 6 fitues primarësh nuk u lejuan fare të hynin në zgjedhje. Këto sjellje krijojnë mungesë mbështetjeje.”
Alimehmeti paralajmëroi se PD-ja po largohet nga identiteti i saj historik:
“PD ka lindur si parti e fjalës së lirë. Pa hapje, pa diskutime, rrezikojmë të kthehemi në parti memecë.”
Ai theksoi se rikthimi te baza dhe nisja e lëvizjes “nga poshtë lart” është i vetmi mekanizëm për të rikthyer legjitimitetin dhe përfaqësimin e vërtetë në PD:
“Nëse nuk kthehemi aty ku kemi bazën, do të kemi probleme serioze me përfaqësimin. Momenti është tani që të nisim lëvizjen nga poshtë.”
Deklaratat e tij vijnë në një moment tensioni të brendshëm për Partinë Demokratike, ku çështjet e përfaqësimit, hapjes dhe procesit të primareve po gjenerojnë debat të fortë brenda strukturave.
About the Author
