Testet e ADN përgënjeshtrojnë pretendimet fillestare se trupat ishin të pengjeve të vrarë në Gaza; Hamasi i dorëzoi përmes Kryqit të Kuq pa sqaruar identitetin e tyre.
Instituti i Mjekësisë Ligjore në Abu Kabir ka njoftuar se tre trupat e dorëzuar mbrëmjen e së premtes nga Hamasi përmes Komitetit Ndërkombëtar të Kryqit të Kuq nuk i përkasin pengjeve izraelite të mbajtura në Gaza. Rezultatet e analizave të ADN-së kanë hedhur poshtë raportimet fillestare të mediave izraelite, sipas të cilave pritej që trupat t’i takonin pengjeve të vrarë gjatë konfliktit.
Trupat u dorëzuan mbrëmjen e kaluar në kufi nga përfaqësuesit e Kryqit të Kuq tek trupat e Forcave të Mbrojtjes së Izraelit (IDF). Hamasi nuk kishte bërë të ditur paraprakisht identitetin ose origjinën e tyre, gjë që çoi në paqartësi lidhur me natyrën e dorëzimit.
Në deklaratën e saj, Komiteti Ndërkombëtar i Kryqit të Kuq theksoi se ka vepruar si ndërmjetës neutral, me miratimin e të dyja palëve, dhe se identifikimi përfundimtar është përgjegjësi e autoriteteve izraelite. Organizata nënvizoi se sipas të drejtës humanitare ndërkombëtare, është detyrë e palëve në konflikt të lokalizojnë, mbledhin dhe kthejnë trupat e të vdekurve tek familjet e tyre.
Ndërkohë, sipas burimeve palestineze në Khan Yunis, Izraeli ka dorëzuar trupat e 30 të burgosurve palestinezë në kuadër të marrëveshjes së armëpushimit të përkohshëm mes palëve, të ndërmjetësuar nga Kryqi i Kuq.
Ky shkëmbim ndodh në një klimë tensioni të lartë, pas akuzave të ndërsjella midis Izraelit dhe Hamasit për vonesa në zbatimin e kushteve të armëpushimit dhe mungesë transparence në procesin e kthimit të trupave dhe pengjeve.
About the Author
