Princi i kurorës në mërgim thotë se Tramp po vëzhgon dhe është gati të ndihmojë, ndërsa regjimi iranian kërcënon me ndëshkime ekstreme.
Princi i kurorës iraniane në mërgim, Reza Pahlavi, ka përsëritur thirrjen e tij drejtuar qytetarëve iranianë që të vazhdojnë protestat dhe të mos largohen nga rrugët, duke deklaruar se Shtetet e Bashkuara po ndjekin nga afër zhvillimet dhe janë të gatshme të mbështesin popullin iranian.
Në një mesazh publik, Pahlavi u shpreh se presidenti amerikan Donald Tramp po vëzhgon guximin e protestuesve dhe ka sinjalizuar gatishmëri për ndihmë. Ai u bëri thirrje qytetarëve të qëndrojnë të palëkundur, duke e cilësuar këtë moment si vendimtar për të ardhmen e Iranit.
Paralelisht, Pahlavi la të kuptohet se një rikthim i tij në Iran mund të jetë i afërt, duke deklaruar se zemra e tij është me protestuesit dhe se pret të jetë së shpejti pranë tyre. Më herët, ai kishte pohuar se po përgatitej për t’u kthyer në atdhe.
Princi në mërgim i ka kërkuar gjithashtu drejtpërdrejt Donald Trampit të ndërhyjë për të ndihmuar popullin iranian, duke e përshkruar atë si një lider që mban fjalën dhe që mund të luajë rol kyç në këtë fazë kritike.
Nga ana e tij, Tramp ka reaguar përmes rrjetit Truth Social, duke deklaruar se Irani po sheh drejt lirisë ndoshta më shumë se kurrë më parë dhe se SHBA qëndron gati për të ndihmuar. Ai paralajmëroi se nëse regjimi iranian përdor armë kundër protestuesve, Shtetet e Bashkuara do të përfshihen. Një ditë më pas, sekretari amerikan i Shtetit Marco Rubio deklaroi se Amerika mbështet popullin e guximshëm të Iranit.
Protestat në Iran shpërthyen pas rënies së monedhës kombëtare në nivelin më të ulët historik, rritjes së ndjeshme të inflacionit dhe shtrenjtimit të ushqimeve. Pakënaqësia u thellua edhe më shumë pas propozimit të buxhetit për vitin 2026, i cili parashikon rritje taksash deri në 62%. Tregtarët dhe dyqanxhinjtë ishin ndër të parët që dolën në rrugë, duke ndezur një valë protestash në mbarë vendin.
Regjimi iranian ka reaguar me tone kërcënuese. Prokurori i Përgjithshëm ka paralajmëruar se pjesëmarrësit në protesta do të trajtohen si armiq të Zotit, një akuzë që në Iran mund të çojë në dënim me vdekje. Udhëheqësi suprem Ali Khamenei i ka quajtur protestuesit vandalë dhe sabotatorë, ndërsa ka sulmuar ashpër edhe Shtetet e Bashkuara, duke parashikuar rrëzimin e udhëheqjes amerikane ashtu siç u rrëzua dikur dinastia perandorake iraniane në vitin 1979.
Situata mbetet e tensionuar dhe me zhvillime të shpejta, ndërsa thirrjet për rezistencë nga opozita në mërgim dhe kërcënimet nga regjimi po e shtyjnë Iranin drejt një përplasjeje gjithnjë e më të fortë politike dhe sociale.
About the Author
