Në ditëlindjen e saj të 30-të, vajza e Alec Baldwin dhe Kim Basinger publikon një rrëfim të fortë, duke i quajtur prindërit persona toksikë dhe duke deklaruar se është çliruar plotësisht nga ndikimi i tyre.
Modelja dhe sipërmarrësja amerikane Ireland Baldwin, vajza e aktorëve të njohur të Hollywood-it Alec Baldwin dhe Kim Basinger, ka shkaktuar tronditje me një postim të sinqertë e të ashpër në blogun e saj “Substack”, në të cilin reflekton mbi marrëdhënien e ftohtë me familjen dhe mbi plagët që i kanë lënë prindërit e saj të famshëm.
Në prag të 30-vjetorit të lindjes, Ireland shkruan: “Kam jetuar një fëmijëri të vetmuar. Për vite të tëra kam ndier nevojën të fitoj dashurinë dhe miratimin e disa njerëzve në familjen time. Sot hyj në të tridhjetat pa atë peshë mbi supe, sepse më në fund kuptova sa toksikë dhe narcisistë kanë qenë ata njerëz që mendoja se më duheshin.”
Ajo përshkruan prindërit e saj si narcisistë, të padenjë dhe toksikë, duke e quajtur këtë kuptim një formë çlirimi shpirtëror. “Asgjë s’ka qenë më çliruese se të kuptoj se sa helmuese kanë qenë këto marrëdhënie,” shkruan ajo në postimin me titull “30, Flirty and Surviving”.
Ireland kujton se është rritur pa praninë e qëndrueshme të prindërve, të cilët në atë kohë ishin në kulmin e famës dhe përfshirë në një divorc të ashpër publik. “Kam qenë vetëm, pa vëllezër e motra, pa prindër të pranishëm. Ky boshllëk më bëri për vite të kërkoj vëmendje nga njerëz që nuk dinin ta jepnin.”
Tani, si nënë e një vajze dyvjeçare të quajtur Holland, lindur nga lidhja me muzikantin RAC (André Allen Anjo), Ireland thotë se ka vendosur të ndërpresë ciklin e dhimbjes dhe ta mbrojë të bijën nga ndikimi i familjes së saj. “Vajza ime nuk ka nevojë të njohë këta njerëz. Dua ta mbroj dhe t’i tregoj se si duket një familje e vërtetë, ku ka dashuri, respekt dhe ndershmëri.”
Deklarata e saj ka bërë jehonë të madhe në mediat amerikane, duke ringjallur debatin për ndikimin që fama, divorci publik dhe mungesa emocionale kanë në fëmijët e yjeve të Hollywoodit. Ireland Baldwin, e cila dikur u rrit në hije të prindërve të saj, duket sot më e vendosur se kurrë për të ndërtuar jetën dhe familjen e saj pa zhurmën dhe toksicitetin e së shkuarës.
About the Author
