Gjykata e Tiranës rrëzon kërkesat e prokurorisë për masa të rënda sigurie, ndërsa opozita dhe mbrojtja ligjore flasin për shkelje flagrante dhe akuza pa bazë
Gjykata e Tiranës ka lënë të lirë 19 protestuesit e arrestuar pas protestës së 24 janarit, duke caktuar për të gjithë masën e sigurisë detyrim paraqitje. Vendimi u mor pas shqyrtimit të kërkesave të prokurorisë, të cilat u konsideruan të pabazuara në prova konkrete.
Gjatë seancës, Prokuroria kërkoi arrest me burg për pesë persona, arrest shtëpie për pesë të tjerë dhe detyrim paraqitje për nëntë protestues. Në përfundim, gjykata rrëzoi masat e rënda dhe vendosi lirimin e të gjithë të ndaluarve, duke pranuar se nuk kishte elementë të mjaftueshëm për kufizime më të ashpra.
Deputeti i Partisë Demokratike, Klevis Balliu, i cilësoi akuzat si shpifje dhe arrestimet si të paligjshme, duke deklaruar se policia do të mbajë përgjegjësi për veprimet e saj. Ai foli për përdorim force dhe dhunë të pajustifikuar gjatë protestës, duke theksuar se ngjarje të tilla janë të papranueshme në një shtet që pretendon standarde demokratike.
Nga ana tjetër, avokatja Eda Grimci deklaroi se ndaj protestuesve nuk ekzistonte asnjë provë specifike që të faktonte vepra penale. Sipas saj, për vetëm pesë raste kishte pamje filmike që nuk lidhnin drejtpërdrejt të arrestuarit me akuzat, ndërsa për 14 raste të tjera nuk kishte as pamje dhe as fotografi, por vetëm raporte shërbimi të firmosura nga efektivë policie.
Grimci theksoi se raportet e shërbimit nuk mund të konsiderohen prova penale dhe se praktika gjyqësore, përfshirë vendime të Gjykatës Europiane të të Drejtave të Njeriut, përcakton qartë se masat e sigurisë nuk mund të bazohen mbi dyshime apo dokumente formale pa prova konkrete.
Vendimi i Gjykatës së Tiranës pritet të ndezë më tej debatin politik dhe ligjor mbi mënyrën e trajtimit të protestave, rolin e policisë dhe standardet e ndjekura nga organi i akuzës në raste që lidhen me tubimet qytetare.
About the Author
