Lamisha Musonda zbulon gjendjen kritike shëndetësore pas vitesh sëmundjeje misterioze dhe u bën thirrje njerëzve për lutje.
Një rrëfim prekës ka tronditur botën e futbollit. Ish-mesfushori i Chelsea-t, Lamisha Musonda, ka bërë publik një mesazh të dhimbshëm, ku pranon se mund t’i kenë mbetur vetëm pak ditë jetë, për shkak të një sëmundjeje të rëndë dhe ende të paqartë.
Belgu 33-vjeçar, i cili iu bashkua Chelsea FC në vitin 2012 nga Anderlecht, së bashku me vëllezërit e tij Tika dhe Charly, ka treguar se prej vitesh po përballet me probleme serioze shëndetësore. Ai nuk ka zbuluar natyrën e saktë të sëmundjes, por ka pranuar se gjendja e tij është kritike.
Në një postim emocional në rrjetet sociale, Musonda shkroi se ndërsa e kupton që mund t’i kenë mbetur vetëm pak ditë, ndihet mirënjohës për njerëzit që kanë qenë pranë tij gjatë jetës. Ai shtoi se dy vitet e fundit kanë qenë jashtëzakonisht të vështira dhe se tani po lufton për të mbijetuar.
“Ishte një jetë me ulje dhe ngritje. Askush nuk mund ta kuptojë plotësisht dhimbjen që kalon një njeri në këto momente. Shëndeti im është kritik, por unë dhe familja ime po luftojmë dhe nuk do të dorëzohemi,” shkruan ai, duke kërkuar mbështetje dhe lutje.
Lamisha Musonda kaloi dy vite në akademinë e Chelsea-t përpara se të largohej drejt klubit belg Mechelen. Më pas, ai pati eksperienca në Spanjë me ekipe të kategorive më të ulëta, si dhe në Afrikë, përpara se të tërhiqej nga futbolli profesionist në vitin 2020.
Familja Musonda është e njohur në botën e futbollit. Vëllai i tij Charly ka luajtur edhe për ekipin e parë të Chelsea-t, ndërsa Tika aktualisht punon si skaut talentesh për Liverpool. Babai i tyre, Charly Musonda Sr, ka qenë ish-futbollist i Anderlecht dhe përfaqësues i Zambisë.
Mesazhi i Lamisha Musondës ka prekur mijëra tifozë dhe figura të futbollit, duke rikujtuar se përtej famës dhe sportit, shëndeti dhe jeta mbeten betejat më të mëdha të njeriut.
About the Author
