Nga fëmijëria e varfër në Quebec deri te humbja e bashkëshortit dhe lufta me sëmundjen, Celine Dion mbetet shembulli i një gruaje që e ktheu dhimbjen në forcë dhe muzikën në dritë.
Celine Dion është një nga zërat më të fuqishëm dhe të dashur në historinë e muzikës, por pas famës së saj qëndron një jetë e mbushur me sakrifica, sfida e humbje të mëdha.
Ajo lindi si fëmija më e vogël në një familje me 14 fëmijë, në varfëri të thellë e cila flinte në një sirtar për mungesë shtrati. Që në moshë të vogël, Celine tregoi talent të jashtëzakonshëm. Në moshën 12-vjeçare u zbulua nga producenti René Angélil, i cili hipotekoi shtëpinë për të financuar albumin e saj të parë.
Në vitet ’80, ajo fitoi Eurovisionin dhe u bë një sensacion ndërkombëtar. Por suksesi i saj erdhi me polemika: marrëdhënia me menaxherin e saj René, 26 vjet më të madh, shkaktoi debat, por dashuria e tyre zgjati dekada. Martesa e tyre madhështore në 1994 në Bazilikën Notre-Dame u transmetua si një martesë mbretërore kanadeze.
Celine përjetoi momente të jashtëzakonshme karriere me “Beauty and the Beast” dhe, më vonë, me këngën e pavdekshme “My Heart Will Go On”, të cilën fillimisht nuk e pëlqeu. Kënga i solli Oscar, Grammy dhe u bë himni i jetës së saj artistike.
Megjithatë, pas skenës ajo përballej me tragjedi. Pasi luftoi për të pasur fëmijë përmes fertilizimit artificial, gëzimi i saj u zbeh nga sëmundja e bashkëshortit. René u diagnostikua me kancer në fyt dhe ndërroi jetë në vitin 2016, vetëm disa ditë përpara se të vdiste edhe vëllai i saj nga e njëjta sëmundje.
Edhe pse e thyer nga humbjet, ajo u rikthye në skenë, duke u bërë artistja më e paguar në historinë e Las Vegasit. Me një pasuri mbi 700 milionë dollarë, Celine është sot jo vetëm një ikonë muzikore, por edhe një filantrope që ka dhuruar miliona për kauza humanitare.
Sot, edhe pse përballet me sfida shëndetësore dhe mungesën e partnerit të saj të jetës, ajo mbetet simbol i forcës dhe i dashurisë së pashtershme për muzikën. Celine Dion nuk është thjesht një zë, ajo është një histori e gjallë që tregon se si dhimbja, kur përballet me shpirt dhe kurajë, mund të kthehet në art.
About the Author
