Një grup influencuesesh amerikane nga Utah shndërrojnë jetën e tyre fetare në spektakël, duke tronditur komunitetin mormon me rrëfime për seks, divorc dhe liri personale. Seriali “La vie secrète des épouses mormones” kthehet në një fenomen kulturor.
Një realitet i ri po sfidon kufijtë e fesë dhe moralit në Amerikë. Seriali televiziv “La vie secrète des épouses mormones”, prodhim i platformës Hulu që do të transmetohet në Disney+ nga 13 nëntori, ka ndezur debat për mënyrën se si gratë e reja mormone po rishkruajnë rregullat e një besimi tradicional.
Historia nis me Taylor Frankie Paul, një influencuese 28-vjeçare nga Utah, e cila në maj të vitit 2023 publikoi në TikTok një video ku njoftonte divorcin e saj, duke pranuar se ishte dashuruar me një tjetër burrë gjatë takimeve me elemente shkëmbimi partnerësh. Ky rrëfim i transmetuar drejtpërdrejt në rrjet, në mesin e grupit të njohur MomTok, shkaktoi një tërmet moral në komunitetin mormon dhe më tej, në mediat amerikane.
Producentët e Jeff Jenkins Productions shfrytëzuan menjëherë këtë tronditje: krijuan një reality-show që ndjek jetën e nëntë grave të reja mormone, të cilat ndajnë përvojat e tyre për dashurinë, fenë, seksualitetin dhe përballjen me tabutë. Seriali i ka kthyer këto gra, të moshës 23–32 vjeç, në figura publike që flasin hapur për martesat e dështuara, shtatzënitë e hershme, abuzimet seksuale dhe përpjekjen për të gjetur identitetin mes rregullave fetare.
“Ne jemi rritur për të qenë bashkëshorte të përkushtuara, të nënshtruara. Por tani duam të tregojmë një tjetër version të grave mormone; më të forta, më të lira, më reale”, thotë Taylor Frankie Paul në episodin e parë.
Seriali ekspozon kontrastin e madh brenda këtij grupi: disa prej tyre mbeten besnike ndaj rregullave të fesë dhe quhen të shenjtat, ndërsa të tjerat, të divorcuara apo më të guximshme, përmenden si mëkataret. Në ekran shfaqen debate të ndezura, lidhje që thyhen, arrestime, grindje në rrjete sociale dhe ndjenja të përziera midis dëshirës për liri dhe frikës nga gjykimi i komunitetit.
Një nga figurat më të përfolura, Jen Affleck, e martuar me një kushëri të aktorit Ben Affleck, shprehet në një intervistë: “Ne e dinim që po bënim diçka të ndërlikuar, por donim të tregonim realitetin, jo përrallën.”
Në serial, diskutimet rreth seksit dhe marrëdhënieve intime janë të hapura dhe shpesh provokuese, duke sfiduar një nga dogmat më të forta të kishës mormone. Një nga protagonistet thotë: “Në fenë tonë, seksi shihet si diçka e turpshme. Por ne jemi brezi që nuk pranon më të heshtë.”
“La vie secrète des épouses mormones” ka kthyer MomTok në një laborator social ku përplasen moderniteti dhe besimi, tradita dhe dëshira për vetëpërcaktim. Me çdo episod, reality-show-i përzien dramën e jetës personale me pyetje të thella për rolin e gruas në komunitetet fetare të Amerikës konservatore.
Në fund, siç shprehet me ironi protagonistja kryesore: “Në rastin më të keq, dikujt do t’i hiqen zgjatimet e flokëve… por ndoshta bashkë me to do të hiqen edhe disa paragjykime.”
About the Author
