Dy ish-punonjëse e akuzojnë këngëtarin për ngacmime dhe dhunë, ai flet për sulm ndaj dinjitetit të tij
Këngëtari i njohur spanjoll Julio Iglesias ka reaguar publikisht për herë të parë, duke mohuar kategorikisht akuzat për abuzim seksual të ngritura ndaj tij nga dy ish-punonjëse.
Akuzat u bënë publike këtë javë, pasi dy gra, njëra ish-punonjëse shtëpie dhe tjetra terapiste fizike, deklaruan se gjatë vitit 2021, ndërsa punonin në rezidencat e Iglesias në Republikën Dominikane dhe Bahamas, ishin përballur me prekje të papërshtatshme, fyerje, poshtërim dhe një ambient presioni e kontrolli të vazhdueshëm.
Njëra prej tyre ka deklaruar se ndihej si objekt dhe si skllave, duke pretenduar se këngëtari e thërriste shpesh në dhomën e tij në fund të ditës së punës dhe e abuzonte. Ajo ka pohuar se këto ngjarje përsëriteshin rregullisht, duke e lënë në një gjendje të rënduar psikologjike.
Përmes një deklarate në rrjetet sociale, Iglesias i ka mohuar me forcë këto akuza, duke theksuar se nuk ka abuzuar, detyruar apo treguar mungesë respekti ndaj asnjë gruaje. Ai i ka cilësuar pretendimet si absolutisht të rreme dhe ka shprehur keqardhje të thellë për situatën e krijuar.
Këngëtari ka deklaruar se përballet me këtë çështje me trishtim, por edhe me vendosmërinë për të mbrojtur të vërtetën dhe dinjitetin e tij përballë akuzave që i ka cilësuar shumë të rënda. Ai ka falënderuar gjithashtu miqtë dhe mbështetësit që, sipas tij, i kanë qëndruar pranë në këtë periudhë.
Akuzat janë bërë publike pas një hetimi trevjeçar të përbashkët nga një media investigative spanjolle dhe një rrjet televiziv ndërkombëtar në gjuhën spanjolle, ku janë mbledhur dëshmi nga rreth 15 ish-punonjës të Iglesias, të cilët kanë punuar me të nga fundi i viteve ’90 deri në vitin 2023. Sipas raportimit, dëshmitë e dy grave kanë mbetur të njëjta gjatë intervistimeve të shumta dhe pretendohet se mbështeten nga dokumente dhe prova të ndryshme.
Deri në këto momente nuk është njoftuar ngritja e ndonjë akuze penale, ndërsa çështja mbetet në fazën e pretendimeve dhe deklarimeve publike. Akuzat nuk janë provuar ligjërisht dhe pritet të shihet nëse do të ketë zhvillime të mëtejshme nga autoritetet kompetente.
About the Author
