Zbulimi i ri e afron Pekinin me projektin për bazën kërkimore hënore deri në vitin 2035, ndërsa konkurrenca në hapësirë intensifikohet
Kina ka bërë një hap tjetër drejt ambicies për të ndërtuar bazën e parë në Hënë, pasi grupi i parë i tullave eksperimentale të krijuara nga dheu hënor u rikthye me sukses në Tokë. Mostrat që u vendosën në kushte të ashpra të hapësirës, u testuan si pjesë e programeve të stacionit hapësinor kinez.
Sipas shkencëtarëve, këto tulla kanë rezistuar goditjeve të mikro-meteoriteve dhe mbetjeve hapësinore, duke ofruar pritshmëri pozitive për ndërtimet e ardhshme në sipërfaqen hënore. Tullat, secila rreth 100 gram, përbëhen nga rigoliti hënor dhe u kthyen në Tokë me misionin Shenzhou-21 javën e kaluar.
Studiuesit shprehen se këto mostrat do të ndihmojnë për të parashikuar mënyrën si materiali degradohet pas 5, 10 apo 20 vitesh në Hënë, duke e afruar ndjeshëm projektin kinez të njohur si Guanghan Palace me realitetin. Profesori i asociuar Zhou Yan deklaroi se mostrat u kthyen në gjendje shumë të mirë, pa dëmtime strukturore, ndërsa ndryshimi i ngjyrës kërkon analiza të mëtejshme.
Përdorimi i materialeve vendore si dheu hënor, energjia diellore dhe mineralet sipërfaqësore konsiderohet thelbësor për të ulur kostot e ndërtimit të bazave të ardhshme. Ky zhvillim vjen teksa gara hapësinore me programin amerikan Artemis II po intensifikohet dhe Pekini synon të ulë astronautët e parë kinezë në Hënë deri në vitin 2030.
Kina paralelisht po përgatit themelet për Stacionin Ndërkombëtar të Kërkimeve Hënore, që synon të jetë funksional deri në vitin 2035.
About the Author
