Hetimi i Prokurorisë së Tiranës, i nisur pas kallëzimit të KLSH, zbuloi shkelje me fond prej mbi 500 milionë lekësh në tendera për pajisje veterinare, blerje kafshësh dhe sisteme monitorimi
Prokuroria e Tiranës ka përfunduar hetimet për një dosje të gjerë që trondit Ministrinë e Bujqësisë dhe Zhvillimit Rural, duke dërguar për gjykim 20 zyrtarë të akuzuar për shpërdorim detyre në bashkëpunim. Hetimi, i regjistruar që në fillim të vitit 2025, u bazua në kallëzimin e bërë nga Kontrolli i Lartë i Shtetit, i cili kishte konstatuar parregullsi të shumta në të paktën shtatë procedura prokurimi publike me një fond total prej 525 milionë lekësh pa TVSH.
Sipas dosjes hetimore, tenderat janë zhvilluar kryesisht me procedurën e negociimit pa shpallje paraprake, një formë që, sipas Prokurorisë, është përdorur në mënyrë abuzive për të shmangur konkurrencën dhe për të favorizuar kompani të caktuara. Hetuesit kanë zbuluar se në disa raste testimi i tregut ishte kryer në mënyrë fiktive, ndërsa dokumentacioni justifikues ishte i paplotë ose i manipuluar.
Tenderat e hetuar lidhen me blerjen e pajisjeve për shërbimin veterinar, përfshirë motoçikleta, kaska dhe veshje pune; furnizime për mbrojtjen e bimëve dhe luftimin e parazitëve bujqësorë; si dhe me blerjen e kafshëve për kompensimin e fermerëve të dëmtuar nga sëmundja e dermatozës nodulare të gjedhit. Një tjetër procedurë e dyshimtë kishte të bënte me instalimin e një sistemi kamerash sigurie në hidrovore.
Prokuroria thekson se zyrtarët e përfshirë, në rolin e anëtarëve të njësive të prokurimit, kanë vepruar në kundërshtim me ligjin, duke mos respektuar kriteret e përcaktuara dhe duke dëmtuar interesin publik. Në përfundim të hetimeve, organi i akuzës vlerësoi se janë plotësuar të gjitha elementet e veprës penale “Shpërdorim detyre” të parashikuar nga neni 248 i Kodit Penal, i kryer në bashkëpunim.
Burime nga hetimi bëjnë të ditur se pjesa më e madhe e tenderave është zhvilluar gjatë viteve 2023–2024, ndërsa disa prej personave të përfshirë kanë pasur funksione të larta në strukturat e ministrisë. Tashmë, dosja me 20 të pandehurit është dërguar në Gjykatën e Tiranës, ku pritet të shqyrtohet në javët e ardhshme.
Ky rast është një ndër më të mëdhenjtë që përfshin sektorin publik në vitet e fundit, duke ngritur sërish pikëpyetje mbi kontrollin dhe transparencën në prokurimet shtetërore, veçanërisht në ministritë me fonde të larta për projekte bujqësore dhe rurale.
About the Author
