Komisioni i Disiplinës i FSHF vendos gjoba dhe pezullime pas shkeljeve disiplinore në disa kategori të futbollit shqiptar
Komisioni i Disiplinës dhe Etikës në Federata Shqiptare e Futbollit ka marrë një sërë vendimesh ndëshkuese, ku në fokus ka qenë klubi i Elbasanit, i cili është sanksionuar sërish për sjellje të gabuar të tifozëve gjatë ndeshjeve.
AF Elbasani është dënuar me një gjobë prej 100 mijë lekësh për përdorimin e mjeteve piroteknike dhe hedhjen e sendeve në fushën e lojës. Paralelisht, janë ndëshkuar edhe zyrtarët e klubit. Armand Mehmetaj është pezulluar për katër ndeshje për sjellje josportive ndaj zyrtarëve të ndeshjes, ndërsa Orgest Gava është dënuar me dy ndeshje pezullim për sjellje josportive ndaj lojtarëve kundërshtarë.
Vendime disiplinore janë marrë edhe ndaj trajnerit të Vllaznisë, Edi Martini, i cili është dënuar me dy ndeshje pezullim për gjeste fyese dhe sjellje josportive gjatë zhvillimit të një ndeshjeje.
Lista e ndëshkimeve përfshin edhe raste nga futbolli amator dhe aktivitetet 5X5, ku disa lojtarë dhe zyrtarë janë pezulluar për sjellje të dhunshme apo sulme ndaj kundërshtarëve, si dhe gjoba për klube që kanë shkelur rregulloret e aktiviteteve për moshat.
Komisioni i Disiplinës ka bërë të ditur se kundër këtyre vendimeve lejohet ankim brenda tre ditëve pranë Komisionit të Apelit, ndërsa ka theksuar se zbatimi i rregullave dhe ruajtja e etikës sportive mbeten prioritete në të gjitha nivelet e futbollit shqiptar.
About the Author
