Prokuroria thotë se Paris Wilson bashkëpunoi me një bos droge për të eliminuar ish-burrin e saj, i cili vdiq pas një sulmi brutal me acid në shtëpinë e tij
Një çështje tronditëse po gjykohet në Britaninë e Madhe, ku një nënë akuzohet se ka bashkëpunuar me një bos droge për të vrarë ish-bashkëshortin e saj për përfitime financiare. Sipas prokurorisë, Paris Wilson i tregoi vendndodhjen e Danny Cahalane shefit të tij të botës së krimit, Ryan Kennedy i njohur si Frost, duke hapur rrugën për një sulm fatal me acid.
Ngjarja e rëndë ndodhi në Plymouth, Devon, ku dy persona hynë në banesën e Cahalane dhe e spërkatën atë me acid sulfurik, duke i shkaktuar djegie të rënda në të gjithë trupin. Viktima, baba i dy fëmijëve, u dërgua me urgjencë në spital, por ndërroi jetë pas javësh të tëra vuajtjesh nga plagët e rënda.
Sipas asaj që u tha në gjykatë, Cahalane ishte i përfshirë në një rrjet shpërndarjeje droge dhe i kishte borxh rreth 120 mijë paund Frostit, pasi kishte humbur paratë në lojëra fati. Pas ndarjes konfliktuale me ish-bashkëshortin, Wilson dyshohet se u kthye në një lidhje kyçe mes tij dhe bosëve të krimit, duke pranuar të jepte informacione në këmbim të parave dhe përfitimeve të tjera.
Prokuroria deklaroi se Wilson e dinte qartë rrezikun që i kanosej ish-bashkëshortit dhe se e tradhtoi atë me vetëdije, duke informuar Frostin për lëvizjet e tij, përfshirë faktin se atë ditë ai do të ndodhej në shtëpi për të sjellë vajzën e tyre. Në mesazhe të lexuara në gjykatë, ajo shprehej se do të paguhej dhe se mendonte se ai e meritonte të lëndohej.
Gjykata dëgjoi gjithashtu se para sulmit kishte pasur kërcënime të shumta me vdekje, tentativa rrëmbimi dhe mesazhe të drejtpërdrejta nga Frost, i cili i kërkonte vazhdimisht shlyerjen e borxhit dhe paralajmëronte se do ta vriste.
Paris Wilson mohon akuzën për vrasje, pjesëmarrje në grup kriminal të organizuar, rrëmbim dhe plagosje të rëndë me dashje. Bashkë me të po gjykohen edhe disa persona të tjerë, të akuzuar për përfshirje në komplotin kriminal që çoi në një nga vrasjet më të rënda dhe tronditëse të viteve të fundit në Mbretërinë e Bashkuar.
About the Author
