Drejtim mjeti në gjendje të dehur dhe tentativa korrupsioni ndaj efektivëve, policia godet shkeljet në disa akse rrugore
Policia Rrugore e Durrësit ka intensifikuar kontrollet në rrugët e qytetit dhe zonave përreth, duke arrestuar katër drejtues automjetesh brenda një periudhe 12-orëshe. Masat u morën në kuadër të monitorimeve të shtuara për parandalimin e aksidenteve rrugore dhe rritjen e sigurisë.
Sipas njoftimit zyrtar, gjatë kontrolleve në rrugën Adria dhe në zonën e Sukthit janë ndaluar dy automjete që kryenin manovra të rrezikshme. Në momentin që punonjësit e Policisë Rrugore u kanë kërkuar drejtuesve kryerjen e testit të alkoolit, shtetasit Sh. D. dhe A. Sh. kanë tentuar të korruptojnë efektivët duke ofruar shuma parash prej 2000 dhe 5000 lekësh të rinj, me qëllim shmangien e testimit.
Nga verifikimet rezultoi se shtetasi Sh. D. drejtonte automjetin në gjendje të dehur, me nivel alkooli 1.13 mg/l, ndërsa drejtuesi tjetër në Sukth kishte një nivel prej 0.55 mg/l.
Gjatë monitorimeve të mëtejshme, në rrugën Vllazërimi është konstatuar shtetasi A. R., 44 vjeç, i cili drejtonte automjetin nën ndikimin e alkoolit, në masën 0.79 mg/l. Ndërkohë, në rrugën Miqësia, shtetasi H. K., 22 vjeç, është ndaluar pasi drejtonte mjetin pa leje drejtimi dhe gjithashtu nën ndikimin e alkoolit, me nivel 0.55 mg/l.
Në përfundim të veprimeve procedurale, u bë arrestimi në flagrancë i katër drejtuesve të automjeteve për veprat penale korrupsioni aktiv i personave që ushtrojnë funksione publike dhe drejtimi i automjetit në mënyrë të parregullt.
Materialet procedurale i janë referuar Prokurorisë për veprime të mëtejshme ligjore, ndërsa Policia Rrugore njofton se kontrollet do të vijojnë me intensitet të shtuar në të gjithë qarkun e Durrësit.
About the Author
