Udhëheqësit bien dakord për bashkëpunim në inteligjencën artificiale, çipat, hapësirën ajrore dhe zinxhirët kritikë të mineraleve
Koreja e Jugut dhe Italia kanë rënë dakord të thellojnë bashkëpunimin strategjik për të nxitur rritjen ekonomike dhe sigurinë teknologjike, me fokus në inteligjencën artificiale, gjysmëpërçuesit, hapësirën ajrore dhe mbrojtjen.
Marrëveshja u konfirmua gjatë takimit në Seul mes presidentit të Koresë së Jugut, Lee Jae Myung, dhe kryeministres italiane, Giorgia Meloni, e cila ndodhet për vizitë zyrtare në vend. Sipas njoftimit të Presidencës koreane, palët do të zgjerojnë bashkëpunimin në sektorë kyç të teknologjisë së avancuar, përfshirë çipat për AI.
Koreja e Jugut, një nga liderët globalë në industrinë e gjysmëpërçuesve, dhe Italia nënshkruan një memorandum mirëkuptimi për bashkëpunim në industrinë e çipave, duke përfshirë aplikimet e lidhura me inteligjencën artificiale. Të dy liderët ranë gjithashtu dakord të intensifikojnë përpjekjet e përbashkëta për ndërtimin e zinxhirëve të furnizimit të qëndrueshëm dhe të besueshëm për mineralet kritike, një fushë me rëndësi strategjike në garën globale teknologjike.
Bisedimet përfshinë edhe bashkëpunimin në kërkimin shkencor, shkëmbimet akademike, turizmin dhe kulturën, si dhe riafirmimin e angazhimit për denuklearizimin e Gadishullit Korean. Italia renditet ndër katër partnerët më të mëdhenj tregtarë të Koresë së Jugut brenda Bashkimit Evropian.
Vizita shënon herën e parë në 19 vite që një kryeministër italian zhvillon një vizitë shtetërore në Seul. Nga ana e saj, Giorgia Meloni shprehu pritshmërinë që presidenti Lee Jae Myung të zhvillojë një vizitë zyrtare në Itali brenda këtij viti, duke i dhënë një shtysë të re marrëdhënieve dypalëshe.
About the Author
