Moska sinjalizon gatishmëri për bisedime direkte me presidentin francez, ndërsa Evropa dhe SHBA kërkojnë rol më aktiv në negociatat për Ukrainën
Kremlini ka konfirmuar se presidenti rus Vladimir Putin është i gatshëm të zhvillojë bisedime me presidentin e Francës Emmanuel Macron. Lajmi është bërë i ditur nga zëdhënësi i Kremlinit, Dmitry Peskov, sipas agjencisë shtetërore ruse RIA Novosti, i cili theksoi se një dialog i tillë do të ishte pozitiv nëse ekziston vullnet politik nga të dyja palët.
Deklarata vjen pas qëndrimit të Macron, i cili ditën e premte u shpreh se do të ishte e dobishme për Europën dhe Ukrainën të rikthehej komunikimi i drejtpërdrejtë me Putinin. Sipas presidentit francez, mungesa e këtij dialogu rrezikon që diskutimet të zhvillohen vetëm mes ndërmjetësve, pa përfshirjen direkte të palëve kryesore.
Ndërkohë, javën e kaluar në Berlin u zhvilluan takime mes përfaqësuesve ukrainas, amerikanë dhe europianë për të diskutuar një zgjidhje paqësore për luftën në Ukrainë, e cila po i afrohet vitit të katërt që nga nisja e agresionit rus. Bisedimet pritet të vazhdojnë këtë fundjavë në Miami, ku negociatorët amerikanë synojnë t’ua përcjellin palës ruse rezultatet e raundit të Berlinit.
Nga ana e Moskës, negociatori rus Kirill Dmitriyev i ka cilësuar takimet e para si konstruktive, duke lënë të hapur mundësinë për hapa të mëtejshëm diplomatikë. Sinjalet e fundit nga Kremlini dhe Parisi sugjerojnë se kanalet e komunikimit mund të rihapen, në një moment delikat për sigurinë europiane dhe të ardhmen e konfliktit në Ukrainë.
About the Author
