Një reklamë kundër tarifave tregtare, ku dëgjohej zëri i ish-presidentit amerikan Ronald Reagan, ndezi tensionet mes Uashingtonit dhe Otavës, duke çuar Presidentin Donald Trump të ndërpresë negociatat tregtare me Kanadanë.
Rajoni kanadez i Ontarios njoftoi se do të ndalojë transmetimin e një reklame kundër tarifave që përdorte zërin e Ronald Reagan, pas një reagimi të furishëm nga Presidenti aktual i Shteteve të Bashkuara, Donald Tramp. Ky i fundit e quajti fushatën të rreme dhe shpalli ndërprerjen e menjëhershme të të gjitha bisedimeve tregtare me Kanadanë.
Në një postim në rrjetin e tij Truth Social, Tramp akuzoi qeverinë e Ontarios për përdorim mashtrues të fjalëve të një presidenti të madh republikan, duke shtuar se reklama shtrembëronte mesazhin origjinal të Reagan mbi tarifat.
Vetëm një ditë më vonë, kryeministri i Ontarios, Doug Ford, deklaroi se kishte vendosur të pezullojë fushatën pas një bisede me kryeministrin kanadez Mark Carney. “Në bisedë me Kryeministrin Carney, Ontario do të ndalojë fushatën e reklamave në SHBA nga e hëna, në mënyrë që negociatat tregtare të mund të rifillojnë,” shkroi Ford në platformën X. Ai shtoi se reklama do të vazhdojë të transmetohet vetëm gjatë dy ndeshjeve të World Series, ku Toronto Blue Jays përballen me Los Angeles Dodgers.
Reklama kishte përdorur fragmente nga një fjalim i vitit 1987, ku Reagan paralajmëronte se tarifat e larta çojnë në kundërmasa nga vendet e huaja dhe nxisin luftëra tregtare të ashpra. Megjithëse materiali ishte përzier nga pjesë të ndryshme të fjalimit, mesazhi mbetet besnik ndaj frymës origjinale të Reagan: përdorimi i tarifave vetëm në mënyrë të kufizuar dhe të përkohshme.
Fondacioni Ronald Reagan reagoi menjëherë, duke e akuzuar qeverinë e Ontarios për “përdorim selektiv të audios dhe videos” dhe duke paralajmëruar se po shqyrton mundësitë ligjore.
Shtëpia e Bardhë, nëpërmjet zëvendësshefit të kabinetit Stephen Miller, tha se Tramp ka shprehur pakënaqësi ekstreme dhe pritet të reagojë sërish pas vendimit për tërheqjen e reklamës. Një zyrtar amerikan konfirmoi se Tramp dhe Carney mund të takohen javën e ardhshme gjatë një darke në kuadër të samitit APEC në Korenë e Jugut.
Fushata e Ontarios, e nisur fillimisht me moton “Do të përdorim çdo mjet për të mbrojtur tregtinë me SHBA”, është kthyer tashmë në një çështje të ndjeshme politike, duke zbuluar sa e brishtë është marrëdhënia tregtare midis dy fqinjëve më të afërt të Amerikës së Veriut.
About the Author
