16 përfaqësuese, stadiumet e Botërorit, favoritët kryesorë dhe yjet që pritet të shkëlqejnë në edicionin e 11 të turneut.
Turneu më i rëndësishëm i futbollit në botën arabe nis këtë të hënë në Katar, ku 16 kombëtare nga Azia dhe Afrika do të ndeshen në Arab Cup 2025, gara që mbahet çdo katër vjet. Përballja hapëse do të jetë midis Tunizisë dhe Sirisë, duke shënuar fillimin e një muaji futbollistik me 32 ndeshje.
Katarit i është besuar për herë të tretë organizimi i turneut, me gjashtë stadiume të përdorura në Kupën e Botës 2022. Ndeshjet do të luhen në Lusail, Al Bayt, Education City, Stadium 974, Khalifa International dhe Ahmad bin Ali. Finalja do të zhvillohet më 18 dhjetor në stadiumin ikonik Lusail.
Turneu sjell ekipe të kalibrit të lartë si Maroku, Algjeria, Tunizia, Egjipti dhe Arabia Saudite, ndërsa shtatë prej tyre tashmë janë të kualifikuara për Kupën e Botës 2026. Kombëtaret janë ndarë në katër grupe:
Grupi A: Tunizi, Siri, Katar, Palestinë
Grupi B: Marok, Komoros, Arabi Saudite, Oman
Grupi C: Egjipt, Kuvajt, Jordani, Emiratet
Grupi D: Algjeri, Sudan, Irak, Bahrein
Palestina siguroi një kualifikim emocional pasi mundi Libinë me penallti, duke sjellë gëzim për tifozët e saj në një kohë të errët nga lufta. Trajneri Ihab Abu Jazar deklaroi se ekipi nuk përfaqëson vetëm futbollin, por edhe shpresën e popullit palestinez.
Edicioni i sivjetshëm sjell edhe fondin më të lartë financiar në historinë e Arab Cup, mbi 36.5 milionë dollarë. Formati mbetet klasik: dy ekipet më të mira të çdo grupi kalojnë në fazën me eliminim direkt deri te finalja.
Mes yjeve që pritet të spikasin janë Ali Olwan i Jordanisë, Aymen Hussein i Irakut, portieri tunizian Aymen Dahmen, superylli i Katarit Akram Afif dhe kapiteni saudit Salem Al-Dawsari.
Interesi për ndeshjet ka qenë i madh dhe biletat e finales janë ezauruar. Në rajonin e Lindjes së Mesme dhe Afrikës së Veriut, turneu do të transmetohet ekskluzivisht në beIN SPORTS PPV.
About the Author
