Sezin Koehler sqaron se nuk e ka shkruar artikullin që pretendon se Dua Lipa është transgjinore, duke e cilësuar rastin si keqpërdorim të rëndë dhe dezinformim
Një lajm i rremë që qarkullon në rrjetet sociale, ku pretendohet se këngëtarja Dua Lipa është transgjinore, ka shkaktuar reagime të forta pasi u zbulua se artikulli është publikuar me firmën e rreme të një gazetareje.
Gazetarja dhe autorja Sezin Koehler ka reaguar publikisht, duke shprehur habinë dhe indinjatën e saj pasi hasi një artikull të publikuar në internet me emrin e saj, në të cilin përhapeshin pretendime të pavërteta për identitetin gjinor të këngëtares. Ajo sqaroi se nuk është autore e shkrimit dhe se bëhet fjalë për një manipulim të qëllimshëm të një artikulli të vjetër, i cili është ndryshuar për të përhapur dezinformim.
Në reagimin e saj, Koehler theksoi se historia është krejtësisht e rreme dhe se Dua Lipa nuk është transgjinore. Ajo shtoi se në versionin fals të artikullit kishte edhe gabime elementare, përfshirë shkrimin e gabuar të emrit të këngëtares, çka sipas saj tregon qartë natyrën mashtruese të përmbajtjes.
Megjithëse autorja e vërtetë ka mohuar publikisht lidhjen me artikullin, pamjet e falsifikuara vazhdojnë të qarkullojnë online, veçanërisht sa herë që Dua Lipa flet për mbështetjen e saj ndaj komunitetit LGBTQ+. Këngëtarja, e lindur femër në vitin 1995, njihet prej vitesh si një aleate e fortë e këtij komuniteti dhe ka shprehur vazhdimisht mbështetje për fansat e saj, përfshirë ata transgjinorë.
Rasti ka ngritur shqetësime serioze mbi përhapjen e lajmeve të rreme dhe keqpërdorimin e identitetit të gazetarëve për të dhënë legjitimitet dezinformimit, duke vënë në pikëpyetje sigurinë dhe besueshmërinë e informacionit në hapësirën digjitale.
About the Author
