Hamas pranon pikat kryesore të planit të paqes së Trump dhe shpreh gatishmëri për negociata, ndërsa Izraeli ul intensitetin e sulmeve në Gaza.
Presidenti amerikan Donald Trump i ka kërkuar Izraelit të ndalojë menjëherë sulmet ajrore në Gaza, pasi Hamas pranoi pjesë të planit të tij 20-pikësh për paqe. Trump deklaroi se grupi palestinez është gati për një paqe të qëndrueshme, ndërsa Izraeli nisi zbatimin e fazës së parë të planit.
Në deklaratën e tij, Hamas pranon armëpushimin e menjëhershëm, lirimin e pengjeve dhe të burgosurve, hyrjen e ndihmave humanitare dhe formimin e një qeverie teknokratësh palestinezë, por kërkon bisedime të reja për çarmatimin dhe refuzon “Bordin e Paqes”, të propozuar nga Trump dhe Tony Blair.
“Kurrë nuk do të pranojmë që të huajt të kontrollojnë palestinezët,” -tha zyrtari i lartë Musa Abu Marzouk.
Bombardimet janë zbutur ndjeshëm në enklavën e shkatërruar, me shenja të një ndalese të afërt.
Katar, Egjipti dhe OKB e mirëpritën përgjigjen e Hamasit, ndërsa Sekretari i Përgjithshëm Antonio Guterres e cilësoi atë si “një dritare reale për t’i dhënë fund tragjedisë në Gaza”.
Megjithatë, 66 mijë palestinezë, kryesisht gra dhe fëmijë, kanë humbur jetën që prej tetorit 2023.
About the Author
