Drejtoria e Përgjithshme e Policisë ka bërë rotacione të rëndësishme në disa komisariate, duke synuar rritjen e efikasitetit dhe forcimin e strukturave vendore të rendit.
Policia e Shtetit ka zbatuar këtë javë një sërë ndryshimesh në nivel drejtuesish në disa komisariate të kryeqytetit dhe të qarqeve, në kuadër të planit për përmirësimin e performancës dhe disiplinës në terren.
Burime zyrtare bëjnë me dije se lëvizjet përfshijnë si transferime, ashtu edhe ngritje në detyrë, duke pasur si synim balancimin e eksperiencës me nevojat operative në terren.
Sipas vendimeve të fundit, janë bërë këto emërime:
Kryekomisar Besmir Qibini, më parë në krye të Komisariatit të Kukësit, është caktuar Shef i Komisariatit nr. 3 në Tiranë.
Komisar Besmir Dervishi, që drejtonte Komisariatin nr. 3, kalon në detyrën e Shefit të Komisariatit nr. 5 në Tiranë.
Kryekomisar Idriz Daulle, që mbante drejtimin e Komisariatit nr. 5, emërohet Shef i Komisariatit nr. 7 në Tiranë.
Kryekomisar Ervis Sançolli, i cili ishte në krye të Komisariatit të Matit, kalon në detyrën e Shefit të Komisariatit të Lezhës.
Kryekomisar Robert Losha, që më parë drejtonte Komisariatin nr. 7 në Tiranë, është emëruar Shef i Komisariatit të Matit.
Komisar Oltion Gjoni, i cili ishte në krye të Komisariatit të Lezhës, do të drejtojë tani Komisariatin e Kukësit.
Sipas Drejtorisë së Përgjithshme, këto ndryshime janë pjesë e një procesi të brendshëm rivlerësimi që do të vijojë edhe në javët në vijim, me synimin për të forcuar menaxhimin në strukturat vendore dhe për të rritur besimin e qytetarëve te Policia e Shtetit.
About the Author
