Rusia intensifikon goditjet me dronë dhe raketa në Ukrainë, ndërsa Zelensky kërkon ndihmë shtesë për mbrojtjen ajrore dhe lavdëron planin e Trump për armëpushimin në Lindjen e Mesme.
Pesë persona kanë humbur jetën në Ukrainë, pas një vale të re sulmesh me raketa dhe dronë ruse të shtunën në mbrëmje, ndërsa disa rajone, përfshirë Odesën, mbetën pa energji elektrike për orë të tëra. Sipas agjencisë franceze AFP, dy nga viktimat u vranë në një sulm mbi një kishë në Kostiantynivka, në lindje të vendit.
Kompania private ukrainase e energjisë, DTEK, njoftoi se furnizimi me energji për rreth 240 mijë familje në Odesë është rikthyer, pasi një goditje ajrore shkatërroi pjesë të infrastrukturës energjetike. Ndërkohë, në territorin rus, një sulm me dron ukrainas në rajonin e Kurskut shkaktoi vdekjen e një burri 81-vjeçar.
Një zyrtar i shërbimit sekret ukrainas SBU deklaroi se forcat ukrainase kanë goditur për herë të tretë brenda një muaji rafinerinë e naftës Bashneft në qytetin rus Ufa, duke shkaktuar shpërthime dhe zjarr masiv. Ai e cilësoi këtë si një sinjal të qartë se kapacitetet strategjike ruse nuk janë të sigurta as brenda kufijve të saj.
Në aspektin e sigurisë rajonale, Sekretari britanik i Mbrojtjes, John Healy, njoftoi se dy avionë të Forcave Ajrore Mbretërore kanë realizuar një mision 12-orësh në kufirin rus, në bashkëpunim me SHBA dhe NATO, për të monitoruar shkeljet e mundshme të hapësirës ajrore nga avionë rusë.
Në planin diplomatik, Presidenti ukrainas Volodymyr Zelensky deklaroi në një postim në X (ish-Twitter) se kishte zhvilluar një bisedë pozitive dhe produktive me Presidentin amerikan Donald Trump, ku diskutuan rreth sulmeve të fundit ndaj sistemit energjetik të Ukrainës dhe mënyrave për të forcuar mbrojtjen ajrore të vendit.
Në një tjetër reagim në Facebook, Zelensky e përgëzoi Trump për planin e suksesshëm të armëpushimit në Lindjen e Mesme dhe e ftoi që të ndërmjetësojë një marrëveshje të ngjashme për t’i dhënë fund luftës në Ukrainë. “Nëse ai mund ta ndalojë një luftë, mund të ndalen edhe të tjerat,” shkroi Zelensky.
Ndërkohë, Kuba mohoi akuzat e SHBA se kishte dërguar trupa për të luftuar përkrah Rusisë në Ukrainë, duke sqaruar se 26 shtetas kubanë janë dënuar me burgime nga 5 deri në 14 vjet për aktivitet mercenar që prej shtatorit 2023.
Lufta Rusi–Ukrainë, që tashmë ka hyrë në ditën e 1326-të, vazhdon të shënojë viktima të përditshme, ndërsa përpjekjet diplomatike për një armëpushim mbeten të pasigurta, mes një konflikti që duket ende larg përfundimit.
About the Author
