Presidenti francez paralajmëron se rendi ndërkombëtar po shkatërrohet dhe se Evropa nuk mund të nënshtrohet përmes tarifave dhe presionit territorial
Presidenti i Francës, Emanuel Makron, ka dërguar një mesazh të fortë politik nga Forumi Ekonomik Botëror në Davos, duke kritikuar rikthimin e ambicieve perandorake në skenën globale, pa e përmendur me emër presidentin amerikan Donald Tramp, por duke iu referuar qartazi politikave të tij ndaj Groenlandës dhe Evropës.
Në fjalimin e tij, Makron paralajmëroi se bota po rrëshqet drejt një rendi pa rregulla, ku e drejta ndërkombëtare po shkelet dhe ku ligji i të fortit po zëvendëson bashkëpunimin dhe qeverisjen kolektive. Ai e cilësoi situatën aktuale si shumë shqetësuese, në një kohë kur lufta në Ukrainë vijon dhe konfliktet në Lindjen e Mesme dhe Afrikë po përshkallëzohen.
Pa e përmendur drejtpërdrejt Donald Tramp, Makron kritikoi ashpër përdorimin e tarifave tregtare si mjet presioni politik dhe territorial, duke nënvizuar se kërcënimet ekonomike ndaj aleatëve janë të papranueshme dhe dëmtojnë themelet e bashkëpunimit ndërkombëtar.
Ai deklaroi se mungesa e qeverisjes kolektive po e shndërron bashkëpunimin në një garë të pamëshirshme, ku Europa rrezikon të dobësohet përmes marrëveshjeve tregtare që synojnë nënshtrimin ekonomik dhe politik të saj. Sipas tij, përdorimi i tarifave si armë kundër sovranitetit territorial është një praktikë që nuk ka logjikë dhe shkon kundër interesave të përbashkëta.
Makron theksoi se Bashkimi Europian mund të detyrohet të përdorë për herë të parë mekanizmin e ashtuquajtur anti-shtrëngim, të njohur si baza tregtare europiane, nëse Shtetet e Bashkuara vendosin tarifa shtesë. Ai e cilësoi këtë skenar si absurd dhe alarmues, duke nënvizuar se është e paimagjinueshme që BE të përballet me një situatë të tillë ndaj një aleati historik.
Presidenti francez konfirmoi gjithashtu se Franca ka marrë pjesë në stërvitje ushtarake në Groenlandë, jo për të kërcënuar askënd, por në shenjë mbështetjeje për Danimarkën dhe respekt për sovranitetin e saj.
Në një tjetër pjesë të fjalimit, Makron u bëri thirrje liderëve europianë të tërheqin më shumë investime kineze në sektorë kyç, duke theksuar nevojën për rritje ekonomike, transferim teknologjie dhe standarde të ndershme tregtare. Ai sqaroi se Europa nuk duhet të jetë vetëm treg për produkte të subvencionuara, por partner aktiv në zhvillimin industrial dhe teknologjik.
Fjalimi i Makronit në Davos vjen në një moment tensioni të lartë transatlantik, pas kërcënimeve të Donald Tramp për tarifa ndaj vendeve që kundërshtojnë planet e tij për Groenlandën, si dhe pas publikimit të një imazhi të krijuar me inteligjencë artificiale ku Groenlanda paraqitej si territor amerikan.
About the Author
