Giannis Lalas, i njohur si “Kuzhinieri” dhe i lidhur ngushtë me kreun e mafies së cigareve, u vra me dhjetëra plumba në një atentat të mirëorganizuar në Arachova. Autorët kishin studiuar çdo lëvizje të tij.
Një tjetër valë gjakderdhjeje ka përfshirë botën e krimit në Greqi. 41-vjeçari Giannis Lalas, i njohur në qarqet mafioze si “Kuzhinieri”, është ekzekutuar brutalisht në Arachova, në atë që hetuesit e përshkruajnë si një “kontratë klasike mafioze vdekjeje”.
Sipas burimeve policore, Lalas ndodhej në ballkonin e një hoteli së bashku me partneren e tij, pak çaste para se të dilnin për darkë, kur u qëllua me breshëri kallashnikovi. Viktima u qëllua në kokë dhe trup, duke ndërruar jetë menjëherë në vendngjarje.
Autorët, që mendohet se kishin vëzhguar për ditë të tëra lëvizjet e tij, vepruan me profesionalizëm, duke e goditur në momentin e duhur dhe më pas duke u larguar me shpejtësi. Pak minuta më vonë, policia gjeti një xhip të djegur në zonën përreth, që dyshohet të jetë përdorur në atentat.
Ekspertët kriminalë po analizojnë mbi 2 000 gëzhoja të gjetura në vendngjarje, ndërsa një ekip special i njësisë kundër zhvatjeve ka mbërritur për të hetuar skemën e ekzekutimit.
Giannis Lalas ishte figura e dytë më e fuqishme e rrjetit mafioz të cigareve të udhëhequr nga “Ediku”, kreu aktual i organizatës, i cili është ende në kërkim nga autoritetet. Vetëm një vit më parë, Lalas i mbijetoi një atentati pranë banesës së tij në Ano Liosi.
Në të kaluarën, ai ishte akuzuar edhe për vrasjen e gazetarit investigativ Giorgos Karaivaz, por u lirua për mungesë provash. Ngjarja e fundit ka tronditur opinionin publik grek dhe ka rikthyer frikën për një luftë të re mes klaneve kriminale që po shpërthen në Athinë e më gjerë.
About the Author
