Policia konfirmon se ngjarja ndodhi në orët e para të mëngjesit në një festë me rreth 150 persona në Robeson County, ndërsa hetimet vazhdojnë.
Një tjetër ngjarje e rëndë ka tronditur Shtetet e Bashkuara këtë mëngjes, ku të paktën 13 persona janë qëlluar me armë gjatë një feste në qytezën Maxton, në qarkun Robeson të Karolinës së Veriut. Sipas zyrës së sherifit Burnis Wilkins, dy persona kanë humbur jetën dhe disa të tjerë ndodhen në gjendje kritike.
Sipas raportimeve të mediave amerikane, të shtënat shpërthyen rreth orës 03:00 të mëngjesit (me orën lokale), në zonën mes Dixon Road dhe McGirt Gin Road, ku po mbahej një festë me mbi 150 pjesëmarrës. Paniku ka qenë i menjëhershëm, me dhjetëra njerëz që kanë vrapuar për t’u larguar nga vendngjarja përpara se të mbërrinin forcat e policisë.
“Deri në këtë moment, 13 persona janë qëlluar, dy prej të cilëve janë konfirmuar të vdekur, ndërsa disa të tjerë ndodhen në gjendje kritike,” thuhet në deklaratën zyrtare të Zyrës së Sherifit të Qarkut Robeson. Autoritetet theksojnë se ngjarja është e izoluar dhe nuk përbën rrezik për komunitetin.
Në hetime janë përfshirë disa agjenci ligjzbatuese federale dhe lokale, ndërsa po mblidhen dëshmitë dhe pamjet e sigurisë për të identifikuar autorin ose autorët e sulmit. Ende nuk dihet motivi i kësaj ngjarjeje tragjike.
Banorët e zonës e përshkruan festën si paqësore në fillim, por thanë se gjithçka ndryshoi për pak sekonda. “Dëgjuam të shtëna njëra pas tjetrës, njerëzit vrapuan në errësirë, ishte tmerr,” tha një dëshmitar.
Ngjarja e sotme shton edhe një tjetër faqe të zezë në kronikën e dhunës me armë në SHBA, e cila vetëm këtë vit ka regjistruar qindra incidente të ngjashme me viktima në aktivitete publike e private.
About the Author
