Një i ri nga Laçi ka rënë në prangat e policisë pasi krijoi një profil të rremë në rrjete sociale me logon e Bankës Kombëtare Tregtare, duke mashtruar dhjetëra qytetarë me premtime për kredi të rreme.
Një operacion i specializuar i Policisë së Shtetit, i koduar “Smart Bank Phishing”, ka çuar në shkatërrimin e një skeme mashtrimi kibernetik që funksiononte përmes rrjeteve sociale. Sipas burimeve zyrtare, autoritetet kanë arrestuar 21-vjeçarin Orlando Gjoka nga Laçi, i cili akuzohet për boshatisjen e llogarive bankare të qytetarëve, ndërsa dy bashkëpunëtorë të tjerë janë proceduar në gjendje të lirë.
Hetimet zbuluan se i riu kishte ngritur një profil të rremë në internet, duke përdorur logon dhe emrin e “Bankës Kombëtare Tregtare” për të fituar besimin e viktimave. Përmes komunikimeve në platforma të ndryshme online, ai u ofronte qytetarëve kredi të rreme deri në 15 mijë euro, duke i shtyrë të dërgonin paraprakisht shuma që varionin nga 750 deri në 1500 euro, në emër të kostove të aplikimit.
Në rastet kur qytetarët kishin llogari ekzistuese në banka, mashtruesi arrinte të hynte në to përmes aksesit të paautorizuar dhe tërhiqte fondet në mënyrë të paligjshme. Policia bën me dije se në disa raste ai ka boshatisur plotësisht depozitat e viktimave, ndërsa të dhënat financiare përdoreshin më pas për krijimin e llogarive të tjera false.
Operacioni u zhvillua nga Drejtoria e Hetimit të Krimit Kibernetik në bashkëpunim me Forcën e Posaçme Operacionale dhe nën drejtimin e Prokurorisë së Tiranës. Hetuesit bënë të mundur lokalizimin dhe ndalimin e autorit në momentin që po përpiqej të zhdukte gjurmët e aktivitetit të tij online.
Sipas policisë, hetimet vijojnë për të identifikuar bashkëpunëtorë të tjerë dhe për të zbardhur plotësisht rrjetin e mashtrimit, i cili dyshohet se ka përfshirë qytetarë nga disa qarqe të vendit.
Ndaj 21-vjeçarit dhe personave të tjerë të përfshirë janë ngritur akuzat për “Mashtrim kompjuterik”, “Falsifikim kompjuterik”, “Ndërhyrje të paautorizuar në sisteme informatike” dhe “Keqpërdorim të thirrjeve telefonike”.
Policia i bën thirrje qytetarëve të tregojnë kujdes ndaj profileve të dyshimta që përdorin emrat dhe logot e institucioneve financiare, duke theksuar se asnjë bankë nuk kërkon pagesa paraprake apo të dhëna personale përmes rrjeteve sociale.
About the Author
