Kontrollorët e trafikut ajror dhe agjentët e sigurisë po punojnë pa pagesë, ndërsa mungesa e stafit çon në shkurtime të detyruara të fluturimeve në aeroportet kryesore.
Më shumë se 1,200 fluturime në Shtetet e Bashkuara u anuluan të martën, si pasojë e mungesës së stafit në kontrollin ajror dhe kufizimeve të vendosura nga Administrata Federale e Aviacionit. Mbyllja e zgjatur e qeverisë, e cila ka hyrë në ditën e 42-të, ka detyruar rreth 13,000 kontrollorë trafiku ajror dhe 50,000 agjentë të sigurisë së aeroporteve të punojnë pa pagesë.
Javën e kaluar, FAA u kërkoi kompanive ajrore të reduktojnë 4% të fluturimeve ditore në 40 aeroportet kryesore. Të martën, shkurtimet arritën në 6% dhe pritet të rriten në 8% të enjten dhe 10% të premten, nëse situata nuk zbutet. Përfaqësues të industrisë dhe qeverisë po diskutojnë mënyrat për të kufizuar pasojat, ndërsa procesi për fundin e mbylljes së qeverisë është ende në zhvillim.
Senati miratoi mbrëmjen e së hënës një projekt-ligj për t’i dhënë fund bllokimit dhe për të financuar qeverinë deri më 30 janar, ndërsa Dhoma e Përfaqësuesve pritet ta shqyrtojë votimin të mërkurën.
Që prej fillimit të mbylljes më 1 tetor, mungesa e kontrollorëve ka shkaktuar dhjetëra mijëra vonesa dhe anulime fluturimesh. Vetëm fundjavën e kaluar, rreth 1.2 milion pasagjerë kanë përjetuar anulime ose vonesa të zgjatura.
Ndërkohë, numri i fluturimeve të anuluara të hënën arriti në gati 3,000, ndërsa 9,600 të tjera u vonuan. Të martën, mbi 1,300 fluturime u shtynë për shkak të mungesës së stafit dhe rrjetit të mbingarkuar të kontrollit ajror.
Presidenti Donald Trump ka paralajmëruar masa të rrepta ndaj kontrollorëve që mungojnë në detyrë, duke deklaruar se do të pezullojë pagesat e atyre që nuk rikthehen menjëherë në punë dhe se do të pranohen dorëheqjet e atyre që nuk janë të gatshëm të punojnë nën këto kushte.
FAA aktualisht ka rreth 3,500 kontrollorë më pak se niveli i nevojshëm për funksionim normal dhe shumë prej tyre kanë qenë të detyruar të punojnë me orare të zgjatura edhe para mbylljes së qeverisë. Situata mbetet e tensionuar, ndërsa industria e aviacionit dhe milionë udhëtarë presin zgjidhjen sa më të shpejtë të krizës.
About the Author
