Me rekomandim nga KLSH për shkarkim, Erzen Tola vijon në postin e Sekretarit të Përgjithshëm të Ministrisë së Arsimit

 Kontrolli i Lartë i Shtetit ka kërkuar zyrtarisht largimin e tij nga shërbimi civil për shkelje të rënda ligjore, por Ministria e Arsimit vazhdon ta mbajë në detyrë

Erzen Tola, Sekretar i Përgjithshëm i Ministrisë së Arsimit, vijon të mbajë postin pavarësisht akuzave të rënda të ngritura nga Kontrolli i Lartë i Shtetit, i cili ka rekomanduar zyrtarisht masën disiplinore “Largim nga shërbimi civil”. Sipas raportit të auditimit, Tola akuzohet për shkelje të rënda ligjore dhe keqadministrim të fondeve publike.

Refuzimi për zbatimin e rekomandimeve të KLSH-së nisi që në kohën kur Ministria e Arsimit drejtohej nga Ogerta Manastirliu, e cila zgjodhi ta mbante Tolën në detyrë. Por edhe pas ndryshimit në krye të institucionit, me emërimin e Mirela Kumbaro, situata nuk ka ndryshuar dhe Tola vijon të ushtrojë funksionin e tij.

Sipas dokumentit zyrtar të KLSH-së, shkeljet e konstatuara lidhen me moskryerjen në kohë të detyrave funksionale, vonesa ose mungesë të inicimit të proceseve gjyqësore për rikthimin e fondeve të përfituara në mënyrë të parregullt nga studentë dhe nëpunës civilë, si dhe keqadministrimin e skemave të mbështetjes financiare për studentët e ekselencës.

Audituesit theksojnë se këto shkelje kanë sjellë dëm financiar dhe cënim të funksionimit normal të institucioneve arsimore, duke e bërë të domosdoshëm largimin e Tolës nga shërbimi civil. Megjithatë, ky rekomandim është bllokuar nga drejtuesit politikë të Ministrisë së Arsimit, duke ngritur dyshime për mbrojtje institucionale dhe ndikim politik.

Pavarësisht akuzave dhe kërkesës së qartë të Kontrollit të Lartë të Shtetit, Erzen Tola vazhdon të qëndrojë në detyrë. Situata ka hapur debat publik mbi standardet e përgjegjshmërisë në administratë dhe mënyrën se si institucionet trajtojnë zyrtarët e akuzuar për shkelje të rënda ligjore.