Ylli i “Pulp Fiction” dhe “The Mask” u zbulua pa shenja jete në moshën 60-vjeçare
Aktori amerikan Peter Greene, i njohur për rolet e tij të errëta dhe tronditëse në filmat kult të viteve ’90, është gjetur i pajetë në apartamentin e tij në lagjen Lower East Side të Nju Jorkut. Lajmi u konfirmua nga menaxheri i tij, Gregg Edwards, i cili bëri të ditur se aktori ishte shpallur i vdekur në vendngjarje, ndërsa autoritetet kanë përjashtuar për momentin çdo dyshim për ndërhyrje kriminale.
Sipas dëshmive, shqetësimi i fqinjëve u ngrit pasi nga banesa e Greene dëgjohej muzikë pa ndërprerje për më shumë se 24 orë. Kjo çoi në një kërkesë për kontroll mirëqenieje, ku policia e gjeti aktorin të shtrirë në dysheme, pa shenja jete. Shkaku i vdekjes pritet të përcaktohet nga mjekësia ligjore.
Menaxheri i tij ka treguar se kishte folur me Greene vetëm disa ditë para vdekjes, duke e përshkruar humbjen si një goditje të rëndë personale dhe profesionale. Ai e cilësoi Greene si një aktor të jashtëzakonshëm dhe një njeri me zemër të madhe, duke theksuar se ndikimi i tij në kinemanë amerikane ishte i veçantë.
Peter Greene u bë i famshëm me rolin e Zed në filmin Pulp Fiction të Quentin Tarantinos, ku la gjurmë me një interpretim të ftohtë dhe tronditës. Po atë vit, ai interpretoi edhe gangsterin Dorian Tyrell në The Mask, përkrah Jim Carrey dhe Cameron Diaz, duke forcuar reputacionin e tij si një nga antagonistët më të paharrueshëm të ekranit.
Gjatë karrierës së tij, Greene numëroi rreth 95 role në film dhe televizion, duke përfshirë tituj të njohur si The Usual Suspects, Training Day, Blue Streak dhe Laws of Gravity. Një nga interpretimet më të vlerësuara mbetet roli i tij në filmin independent Clean, Shaven, ku portretizoi me intensitet një person që vuante nga skizofrenia, rol që u lavdërua gjerësisht nga kritika.
Jeta e tij personale nuk ishte pa vështirësi. I lindur në vitin 1965 në New Jersey, Greene u largua nga shtëpia në moshën 15-vjeçare dhe jetoi për një kohë në rrugët e Nju Jorkut, ku u përball me varësinë nga droga. Megjithatë, ai arriti të ndërtonte një karrierë të fortë artistike dhe ishte gati të rikthehej në xhirime në janar, në një film të pavarur përkrah Mickey Rourke.
Peter Greene lë pas një motër dhe një vëlla, ndërsa vdekja e tij ka ngjallur reagime të shumta në botën e kinemasë, ku ai kujtohet si një aktor i fuqishëm, kompleks dhe i paharrueshëm.
About the Author
