Autoritetet portugeze arrestojnë katër persona, të dyshuar si pjesë e një rrjeti ndërkombëtar trafikimi
Autoritetet portugeze kanë ndaluar një narko-nëndetëse që transportonte mbi 1.7 ton kokainë në ujërat e Atlantikut, afërsisht 1,000 milje detare larg bregut të Lisbonës. Operacioni u zhvillua nga Policia Gjyqësore në bashkëpunim me Marinën Portugeze, Agjencinë Britanike të Krimit dhe Agjencinë Amerikane të Anti-Drogës (DEA).
Anija gjysmë-nëndetëse, e dizajnuar posaçërisht për të transportuar ngarkesa të mëdha droge pa u zbuluar lehtësisht, ishte nisur drejt gadishullit Iberik dhe dyshohet se kishte si destinacion tregjet evropiane të trafikimit.
Në bord u arrestuan katër persona, përfshirë dy shtetas ekuadorianë, një venezuelian dhe një kolumbian. Të dyshuarit u paraqitën në gjykatë në Ishujt Azore dhe tashmë ndodhen në paraburgim.
Sipas autoriteteve portugeze, përbërja e grupit tregon se kemi të bëjmë me një organizatë kriminale ndërkombëtare dhe jo me një grup të izoluar. Pas ndalimit, narko-nëndetësja nuk mund të tërhiqej në port për shkak të motit të keq dhe strukturës së saj të brishtë, ndaj u fundos në det të hapur.
Narko-nëndetëset janë përdorur gjithnjë e më shpesh vitet e fundit nga rrjetet e trafikut të kokainës që vijnë kryesisht nga Amerika e Jugut drejt Evropës. Vetëm këtë vit, disa operacione të ngjashme janë regjistruar në Atlantik, përfshirë sekuestrimin në mars të një mjeti tjetër me 6.5 ton kokainë.
Hetimet vijojnë për të identifikuar rrjetin e plotë të trafikut dhe destinacionet përfundimtare të ngarkesës. Autoritetet ndërkombëtare paralajmërojnë se trafikimi përmes narko-nëndetëseve po bëhet një metodë standarde dhe kërkon më shumë bashkërendim mes vendeve të prekura.
About the Author
