Ikona e mikrofonit që komentoi për dekada ngjarjet më të rëndësishme sportive, lë pas një trashëgimi të paharruar
Është ndarë nga jeta një prej figurave më emblematike të medias dhe sportit shqiptar, komentatori dhe gazetari i njohur sportiv Ismet Bellova. Largimi i tij shënon një humbje të madhe për gazetarinë sportive dhe për breza të tërë dëgjuesish që u rritën me zërin e tij karakteristik në valët e radios.
Ismet Bellova lindi në Tiranë më 1 qershor 1934 dhe përfundoi studimet e larta në ILKF Vojo Kushi në vitin 1960. Ai i kushtoi jetën me përkushtim dhe pasion edukimit fizik dhe gazetarisë sportive, duke u bërë një nga figurat më të respektuara në këtë fushë. Bellova ishte i martuar me Mjeshtren e Merituar të Sportit, Bukuroshe Shtiza.
Rrugëtimi i tij sportiv nisi herët, në vitin 1948, kur u shpall kampion i vendit për të rinj në pingpong. Emri i tij u bë pjesë e historisë së transmetimeve sportive shqiptare më 29 nëntor 1950, kur komentoi ndeshjen Dinamo Partizani 1 me 0, finalen e Kupës së Shqipërisë, duke hapur kështu një karrierë të gjatë dhe të suksesshme në Radio Tirana.
Për kontributin e jashtëzakonshëm në sport, arsim dhe gazetari, Ismet Bellova u nderua me tituj dhe dekorata të shumta shtetërore dhe sportive, ndër to Mësues i Popullit, Urdhri Naim Frashëri Klasi i Artë, Urdhri i Punës Klasi i Parë, Nderi i Sportit Shqiptar, Urdhri Olimpik, Mirënjohja e Tiranës, Nderi i Sportit Dibran dhe titulli Kalorësi i Urdhërit të Flamurit.
Gjatë jetës së tij ai u vlerësua edhe me çmime prestigjioze në fushën e medias. Në vitin 2004 u krijua Çmimi Ismet Bellova në gazetarinë sportive, ndërsa vetë ai mori Çmimin e Karrierës në RTSH, dy herë Çmimin Anton Mazreku dhe Mikrofonin e Artë.
Ndarja nga jeta e Ismet Bellovës lë një boshllëk të madh në sportin dhe median shqiptare. Kujtimi i tij do të mbetet i gjallë te brezat që edukoi, te dëgjuesit që e ndoqën për dekada dhe në historinë e gazetarisë sportive shqiptare, ku emri i tij do të zërë gjithmonë një vend nderi.
About the Author
