Ndahet nga jeta në moshën 52-vjeçare Ipeshkvi i Dioqezës së Sapës, Imzot Simon Kulli, i cili pësoi një arrest kardiak mëngjesin e së shtunës.
Ai lindi më 14 shkurt 1973 në fshatin Pistull të Sapës, 20 kilometra larg Shkodrës. Studimet filozofike dhe teologjike i nisi pas hyrjes në Seminarin Ndërdioqezan Shqiptar në vitin 1992. Në vitin 1999 u shugurua diakon në Katedralen e Shkodrës, ndërsa më 29 qershor 2000 u shugurua meshtar, një nga shugurimet e para pas 46 viteve të regjimit komunist.
Pas shugurimit, shërbeu në Dajç të Zadrimës dhe ishte Sekretar i Ipeshkëvit të Sapës. Në vitin 2002 u emërua Kancelar i Dioqezës së Sapës dhe më pas shërbeu si famullitar i Katedrales “Shën Tereza e Kalkutës” në Vau-Dejës. Për shumë vite drejtoi edhe Caritasin Dioqezan, si dhe mbajti detyrat e Vikarit të Përgjithshëm dhe Ekonomit të Dioqezës. Me ndarjen nga jeta të Imzot Lucjan Avgustinit në vitin 2016, ai u zgjodh Administrator Dioqezan i Sapës.
About the Author
