Analisti Paltor Nesturi paralajmëron se brenda Partisë Socialiste po zhvillohen dinamika të reja që mund të sjellin ndryshime të thella në qeveri dhe në drejtimin politik të shumicës.
Analisti Paltor Nesturi ka hedhur një deklaratë të bujshme lidhur me situatën e brendshme në Partinë Socialiste, duke thënë se ka nisur një proces i brendshëm lëvizjesh që mund të sjellë përmbysje të rëndësishme në skenën politike. Duke folur për News 24, ai la të kuptohet se ndryshimet mund të prekin edhe nivelin më të lartë të qeverisë, përfshirë postin e kryeministrit.
Sipas Nesturit, zhvillimet e fundit, veçanërisht debati rreth SPAK dhe presioni i ndërkombëtarëve për të mos cenuar institucionet e drejtësisë, po ndikojnë fuqishëm në dinamikën e brendshme të PS. Ai solli në vëmendje deklaratat e fundit të diplomatit Gonzato, i cili mbrojti fuqimisht pavarësinë e SPAK dhe kundërshtoi çdo tentativë për kufizimin e kompetencave të tij, duke nënvizuar rolin e Bashkimit Evropian si kontribues financiar dhe logjistik të këtij institucioni.
Nesturi tha se sulmet politike ndaj Gonzatos nuk duhen parë të izoluara, por si pjesë e një lëvizjeje më të gjerë për të ushtruar presion mbi SPAK. Ai theksoi se nëse më parë tentativat për të dobësuar institucionet e drejtësisë janë frenuar nga ndërkombëtarët, tani duket se ekziston një përpjekje e re dhe më urgjente.
Sipas tij, brenda PS ka nisur një reflektim i fortë mbi mënyrën si duhet të funksionojë partia në raport me hetimet e SPAK, sidomos pasi disa ministra dhe zyrtarë të lartë rezultojnë të jenë prekur nga hetimet. Nesturi u shpreh se partia nuk mund të vijojë “të paguajë faturën politike” për sjelljet individuale të zyrtarëve të saj, ndërsa anëtarët e thjeshtë e ndjejnë veten të zhgënjyer kur shohin abuzime në nivelet më të larta.
Ai paralajmëroi se PS mund të ndërmarrë një ndryshim të thellë, duke prekur jo vetëm emrat e ministrave, por edhe modelin me të cilin partia qeveris dhe ndërton politikën publike. Madje nuk përjashtoi as skenarin e një kryeministri të ri, nëse presioni i brendshëm e bën të domosdoshëm një riorganizim të plotë.
“Partia nuk mund të shohë vetëm çfarë bën SPAK, duhet të reagojë vetë”, theksoi Nesturi, duke shtuar se lëvizjet e brendshme kanë nisur dhe se të ardhmen e mazhorancës do ta përcaktojë pikërisht ritmi dhe mënyra e këtyre ndryshimeve.
Deklaratat e tij kanë hapur diskutime të reja mbi stabilitetin e PS dhe lëvizjet e mundshme që mund të ndryshojnë balancat politike në vend.
About the Author
