Një aksident tragjik në bulevardin “Ismail Qemali” i mori jetën 17-vjeçarit Leandro Shametaj, që po kthehej nga puna në orët e para të mëngjesit.
Leandro Shametaj, vetëm 17 vjeç, punonte çdo ditë si kamarier në një lokal të qytetit të Vlorës për të ndihmuar familjen e tij. Mbrëmë, pasi kishte mbyllur turnin, mori motorin e tij të vogël dhe u nis për në shtëpi. Nuk arriti kurrë ta shihte më derën e shtëpisë.
Rreth orës 00:15 të mesnatës, në bulevardin “Ismail Qemali”, një makinë luksoze “Porsche”, e drejtuar nga një 32-vjeçar në gjendje të dehur, u përplas me motomjetin e tij. Goditja ishte aq e fortë, sa trupi i djalit u hodh disa metra larg. Ai ndërroi jetë në vend, pa mundur të marrë ndihmë.
Banorët përreth dëshmuan për një zhurmë të frikshme, ndërsa pamjet që pasuan ishin rrëqethëse: një motor i shkatërruar, një trup i pajetë dhe heshtja e natës që u thye nga klithmat e familjarëve.
Leandro ishte djali i vetëm i familjes Shametaj. Kishte ëndrra të mëdha, donte të studionte më vonë për hoteleri dhe të hapte një biznes të vetin. Sot, në vend të ëndrrave të tij, mbeten vetëm lotët e prindërve që prisnin djalin të kthehej në shtëpi.
Shoferi 32-vjeçar, me inicialet H.B., është arrestuar në flagrancë. Testet kanë konfirmuar se ai ishte në gjendje të dehur dhe po udhëtonte me shpejtësi të lartë, që dyshohet të ketë kaluar 200 km në orë.
Ky aksident i rëndë rikthen dhimbshëm pyetjen që s’ka marrë ende përgjigje: deri kur rrugët e vendit do të jenë vendet ku shuhet rinia, ku fajtorët pinë, drejtojnë e vrasin, ndërsa viktimat janë gjithmonë të pafajshmit?
About the Author
