Reperi i njohur flet si rrallëherë për rrugëtimin e tij dhe tregon pse disiplina, jo talenti, e ka mbajtur në majë të skenës shqiptare.
Në një intervistë të sinqertë për Top Albania Radio, Noizy ka ndarë një anë të rrallë të vetes, atë të njeriut që nuk mbështetet te fama apo talenti i lindur, por te puna dhe disiplina e hekurt. Reperi që ka mbizotëruar skenën për më shumë se një dekadë, ka pranuar se suksesi i tij nuk vjen nga dhuntia, por nga përkushtimi i pandalshëm që e shtyn çdo ditë drejt rezultateve të reja.
“Nuk jam më i talentuari. Thjesht kam më shumë disiplinë se të gjithë,” – tha ai, duke nënvizuar se rutina dhe puna e përditshme janë baza e karrierës së tij. “Ka ditë që s’kam motivim, por kam disiplinë. Dhe kjo mjafton për të mos u ndalur.”
Noizy shtoi se një artist me talent mund të krijojë një këngë të mirë, por ai bën tri, sepse nuk i dorëzohet lodhjes dhe e trajton muzikën si një mision. “Kam forcë, fokus dhe përgatitje fizike për këtë punë. Nuk ndalem kurrë, edhe kur nuk kam frymëzim.”
Deklarata e reperit është bërë virale në rrjetet sociale, ku shumë ndjekës e kanë cilësuar si më të pjekurën dhe më realen e tij deri më sot. Për disa, mesazhi i Noizyt është një leksion suksesi: talenti të nis, por disiplina të çon në majë.
Në një skenë muzikore ku shumë artistë kërkojnë famë të shpejtë, Noizy duket se po zgjedh të flasë për rrënjët e vërteta të suksesit, punën, sakrificën dhe disiplinën. Dhe ndoshta kjo është arsyeja pse, pas kaq vitesh, ai mbetet ende “numri një”.
About the Author
