Nuk kam vozitur prej 25 vitesh, reagimi i ish-ministrit që ndezi debat pas heqjes së shoferit të përjetshëm
Që prej 1 janarit, një vendim i ri buxhetor në Francë i ka hequr një sërë privilegjesh ish-kryeministrave dhe ish-ministrave të Brendshëm, përfshirë shoferin dhe mbrojtjen policore të përjetshme. Masa prek 24 personalitete dhe synon të kursejë disa miliona euro në vit, duke kufizuar mbrojtjen policore në disa vite dhe përdorimin e shoferit deri në një afat maksimal.
Vendimi, i cili fillimisht pritej të kalonte pa shumë zhurmë, u kthye shpejt në temë debati pas reagimit të ish-ministrit të Brendshëm Daniel Vaillant. Në një intervistë për median franceze RTL, ai deklaroi se nuk ka drejtuar automjet prej 25 vitesh dhe se nuk është më në gjendje të rikthehet pas timonit, duke shtuar me ironi se kjo situatë përbën një ndryshim të madh në jetën e tij të përditshme.
Edhe pse Vaillant theksoi se nuk ka qenë kurrë në favor të privilegjeve, fjalia e tij si do t’ia bëj tani u përhap me shpejtësi në rrjetet sociale, duke nxitur reagime të shumta. Shumë qytetarë e cilësuan deklaratën si të shkëputur nga realiteti dhe të papërshtatshme në një kohë kur shumica e francezëve përballen me vështirësi ekonomike dhe masa shtrënguese.
Sipas rregullave të reja, mbrojtja policore për ish-kryeministrat kufizohet në tre vite, ndërsa për ish-ministrat e Brendshëm në dy vite. Shoferi shtetëror, nga ana tjetër, nuk mund të zgjasë më shumë se dhjetë vite pas largimit nga detyra. Megjithatë, zgjatja e këtyre masave mbetet e mundur në raste të veçanta, kur ekziston rrezik i vërtetuar.
Dy përjashtime janë bërë për figura si Bernard Cazeneuve dhe Manuel Valls, për shkak të funksioneve të ndjeshme që kanë ushtruar në të kaluarën. Për të tjerët, rregullat e reja hyjnë në fuqi pa përjashtim.
Debati i hapur nga reagimi i Daniel Vaillant ka rikthyer në vëmendje çështjen e privilegjeve politike dhe perceptimin publik mbi to, duke nxjerrë në pah hendekun mes jetës së ish-zyrtarëve të lartë dhe realitetit të përditshëm të qytetarëve të zakonshëm.
About the Author
