Pesë pika kyçe në botë nga Europa në Azi dhe Lindjen e Mesme rrezikojnë të ndezin një konflikt të përmasave botërore
Viti 2026 po shihet nga analistët e sigurisë si një nga më vendimtarët e dekadës, ndërsa tensionet ndërkombëtare po rriten në disa rajone strategjike që mund të përshkallëzohen shpejt në një konflikt global. Lufta që vazhdon në Ukrainë, përplasjet gjeopolitike në Azi dhe Lindjen e Mesme, si dhe lëvizjet ushtarake të fuqive të mëdha, kanë krijuar një situatë të brishtë që mund të dalë jashtë kontrollit.
Një nga pikat më të rrezikshme është Deti i Karaibeve, ku Shtetet e Bashkuara kanë rritur ndjeshëm praninë ushtarake përballë Venezuelës. Vendosja e aeroplanmbajtëseve, bombarduesve strategjikë dhe forcave detare shihet si një sinjal presioni ndaj regjimit të Nicolas Maduro, por ekspertët paralajmërojnë se çdo incident i vogël mund të ndezë një përplasje të drejtpërdrejtë.
Në Europën Veriore, Gjiri i Finlandës është shndërruar në një tjetër vatër të nxehtë. Kjo zonë, që ndodhet mes Rusisë dhe vendeve anëtare të NATO-s, është përdorur për operacione të fshehta, sabotime të infrastrukturës dhe shkelje të hapësirës ajrore. Sipas specialistëve të sigurisë, Moska mund ta përdorë këtë korridor për të testuar reagimin e Aleancës Atlantike dhe për të shpërqendruar vëmendjen nga fronti ukrainas.
Në Azi, Ishujt Kinmen pranë brigjeve të Kinës përfaqësojnë një tjetër rrezik serioz. Këto ishuj të administruar nga Tajvani ndodhen vetëm pak kilometra nga territori kinez dhe mund të shërbejnë si një provë force nga Pekini. Një ndërhyrje e mundshme do të vinte në pikëpyetje reagimin e Tajvanit dhe të aleatëve të tij, përfshirë Shtetet e Bashkuara.
Lindja e Mesme mbetet po aq e paqëndrueshme, veçanërisht Ngushtica e Hormuzit, një arterie jetike për tregtinë globale të naftës. Çdo përpjekje e Iranit për ta bllokuar këtë rrugë do të kishte pasoja të menjëhershme për ekonominë botërore dhe do të mund të shkaktonte një reagim ushtarak ndërkombëtar.
Së fundi, Gadishulli Korean vazhdon të jetë një pikë kritike. Koreja e Veriut, e inkurajuar nga aleancat e reja dhe zhvillimet ushtarake, shihet si një faktor i paparashikueshëm. Çdo provokim i rëndë kundër Koresë së Jugut, veçanërisht ndaj Seulit, do të kishte pasoja dramatike për rajonin dhe më gjerë.
Ekspertët paralajmërojnë se viti 2026 mund të jetë një pikë kthese për rendin botëror. Ndërsa diplomacia mbetet ende një mjet i hapur, rritja e tensioneve dhe demonstrimet e forcës ushtarake po e bëjnë skenarin e një përplasjeje globale gjithnjë e më të mundshëm.
About the Author
