Ish-reperi amerikan dënohet me 50 muaj burg për “transport me qëllim prostitucioni”, ndërsa akuzat për trafik seksual u rrëzuan; viktimat dhe opinioni publik flasin për një padrejtësi të thellë.
Pas muajsh procesi të bujshëm në SHBA, reperi P. Diddy (Sean Combs) ka marrë vendimin përfundimtar të gjykatës: 50 muaj burg, 5 vite kushtëzim dhe një gjobë prej 500 mijë dollarësh. Vendimi, ka shkaktuar një valë indinjate, pasi ish-ylli i muzikës rrezikonte burgim të përjetshëm për akuzat e dhunës seksuale, trafikimit dhe shfrytëzimit seksual.
P. Diddy u shpall fajtor vetëm për “transport me qëllim prostitucioni”, ndërsa u shpall i pafajshëm për trafikim dhe bashkëpunim kriminal. Sipas burimeve gjyqësore, mungesa e disa dëshmitarëve kyç dhe mesazhet e dyshimta mes viktimave dhe artistit dobësuan rastin e prokurorisë, duke çuar në një dënim shumë më të butë.
Viktimat e pretenduara shprehen “të shkatërruara” nga vendimi dhe pritet të vazhdojnë betejën në gjykatat civile, ku standardet e provës janë më të ulëta dhe mund të kërkojnë dëmshpërblime milionëshe. Një nga avokatët e tyre ka deklaruar se mbi 100 gra mund të jenë viktima potenciale të artistit.
Ky vendim, edhe pse shmang burgimin e përjetshëm, e vulos rënien e një prej ikonave të muzikës amerikane. Pas dekadash suksesi dhe një karriere që ndikoi industrinë hip-hop, P. Diddy përballet tani me një dëm të pariparueshëm për reputacionin e tij, teksa mediat e quajnë këtë rast një plagë morale për kulturën muzikore amerikane.
About the Author
