Ish-bashkëpunëtori që kundërshtoi luftën në Ukrainë rrëfen klimën e presionit dhe pasigurisë në pushtetin rus
Një episod i rrallë nga brendësia e pushtetit rus po hedh dritë mbi tensionet dhe frikën që shoqërojnë luftën në Ukrainë. Presidenti i Rusisë, Vladimir Putin, i ka përcjellë një paralajmërim të zymtë ish-zëvendësshefit të kabinetit të tij, Dmitry Kozak, duke i lënë të kuptohet se një humbje në Ukrainë mund të kishte pasoja fatale jo vetëm për kreun e shtetit, por edhe për rrethin e tij më të afërt.
Takimi mes Putinit dhe Kozakut ka ndodhur pak para dorëheqjes së këtij të fundit në shtatorin e kaluar, pas vitesh të tëra në rrethin e ngushtë të pushtetit. Kozak, një figurë kyçe që nga vitet 1990 dhe bashkëpunëtor i hershëm i Putinit që nga koha e Shën Petersburgut, kishte qenë prej kohësh në hije, veçanërisht që nga shkurti i vitit 2022, dy ditë para nisjes së agresionit ndaj Ukrainës.
Në mbledhjen vendimtare të Këshillit të Sigurisë në Kremlin, ku u diskutua njohja e rajoneve separatiste të Donbasit dhe ndërhyrja ushtarake, Kozak ishte i vetmi që foli hapur kundër aneksimit dhe luftës. Fjalimi i tij, që zgjati rreth 40 minuta, u hoq më pas nga transmetimi zyrtar, duke sinjalizuar izolimin e tij politik.
Sipas mediave ndërkombëtare, vetëm dy ditë pas nisjes së luftës, Kozak i kishte bërë të qartë Putinit se nuk do të zbatonte urdhra që çonin drejt kapitullimit të Ukrainës, edhe nëse kjo do t’i kushtonte lirinë apo jetën. Që nga ajo kohë, ai nuk është shfaqur më publikisht, por për shkak të lidhjeve të vjetra, nuk u ndëshkua drejtpërdrejt nga Kremlini dhe vazhdoi të mbante një zyrë pranë qendrës së pushtetit.
Edhe pse Kozak nuk konsiderohet figurë liberale apo opozitare dhe ka pasur rol në integrimin e Krimesë pas vitit 2014, kundërshtimi i tij ndaj luftës dhe mesazhi i Putinit gjatë largimit të tij zbulojnë pasigurinë që ekziston në majat e pushtetit rus. Lufta e zgjatur, humbjet njerëzore dhe presioni ekonomik po rëndojnë gjithnjë e më shumë mbi Rusinë, duke ushqyer frikën e një krize të brendshme.
Analistët vërejnë se këto sinjale tregojnë një Kremlin nën presion, ku edhe vetë Putini duket i vetëdijshëm për rreziqet që sjell një konflikt pa fund dhe për pasojat personale që mund të ketë një dështim në Ukrainë.
About the Author
