Kreu i Lidhjes Demokratike të Kosovës thotë se dorëheqja është obligim moral dhe politik, vendimi final i takon Kuvendit të partisë
Pas rezultateve zhgënjyese në zgjedhjet e 28 dhjetorit, ku Lidhja Demokratike e Kosovës u rendit e treta, kryetari i saj Lumir Abdixhiku ka paralajmëruar se do ta dorëzojë mandatin e tij në Kuvendin e partisë.
Abdixhiku u shpreh se dorëheqja për të është një detyrim moral dhe politik, duke theksuar se do ta paraqesë zyrtarisht këtë vendim dhe do t’i lërë Kuvendit të LDK-së përgjegjësinë për të vendosur nëse do ta pranojë apo jo. Sipas tij, vetëm përmes votës së strukturave të partisë mund të merret një vendim legjitim për të ardhmen e drejtimit.
Ai shtoi se në rast se Kuvendi i partisë nuk e pranon dorëheqjen, do të jetë i detyruar të vazhdojë ushtrimin e detyrës si kryetar, duke respektuar vullnetin institucional të LDK-së.
Kreu aktual i LDK-së nënvizoi gjithashtu se çdo anëtar i partisë ka të drejtë të kandidojë për postin e kryetarit, duke garantuar se proceset e brendshme do të jenë të hapura dhe demokratike. Ai theksoi se pavarësisht rezultatit zgjedhor, LDK mbetet e bashkuar dhe vendimmarrja do të vazhdojë të jetë kolektive.
Duke folur për procesin e zgjedhjes së presidentit të vendit, Abdixhiku riafirmoi qëndrimin e LDK-së se ky proces duhet të realizohet përmes një konsensusi të gjerë politik dhe jo përmes imponimit të një kandidati nga një forcë e vetme politike.
Deklarata e tij vjen në një moment delikat për Lidhja Demokratike e Kosovës, ndërsa zhvillimet e ardhshme brenda partisë pritet të përcaktojnë drejtimin politik të saj në periudhën paszgjedhore.
About the Author
