Kreu i Partisë së Lirisë i është drejtuar zyrtarisht gjykatës me kërkesën për heqjen e masës së sigurisë, duke pretenduar se nuk ekzistojnë më arsye ligjore që ajo të mbetet në fuqi.
Një vit pas arrestimit që ndezi debat të gjerë në opinionin publik, Ilir Meta ka bërë lëvizjen e radhës në betejën e tij ligjore. Përmes një kërkese zyrtare drejtuar gjykatës, ai kërkon shuarjen e masës së sigurisë që e kufizon prej një viti, duke argumentuar se hetimi nuk ka sjellë prova të reja dhe se nuk ekziston më asnjë rrezik që të justifikojë vazhdimin e saj.
Burime pranë mbrojtjes së Metës theksojnë se dokumenti i dorëzuar në gjykatë kërkon rivlerësimin e plotë të situatës, me pretendimin se masat e marra ndaj tij kanë qenë të pajustifikuara dhe të mbështetura në indicie të paqarta. Sipas tyre, që prej vendosjes së masës, procesi hetimor ka hyrë në fazë pasive dhe nuk ka pasur zhvillime që të arsyetojnë vazhdimin e kufizimit të lirive të tij.
Kërkesa e re vjen në një moment kur hetimet ndaj ish-presidentit vijojnë ende, ndërsa çështja mbetet ndër më të komentuarat e vitit në arenën politike dhe gjyqësore. Nëse gjykata pranon kërkesën e Metës, masa e sigurisë ndaj tij do të hiqet, duke shënuar një kthesë të rëndësishme në procesin që ka mbajtur të vëmendshëm skenën politike për më shumë se dymbëdhjetë muaj.
Seanca për shqyrtimin e kërkesës pritet të zhvillohet ditët në vijim, ndërsa pala mbrojtëse ka paralajmëruar paraqitjen e provave të reja që, sipas tyre, konfirmojnë se zbatimi i masës nuk ka më asnjë bazë ligjore.
About the Author
